रसुवामा विद्युत् खपत घट्यो

रसुवा, रसुवामा विद्युत् खपत घटेको छ । आर्थिक वर्ष २०७४÷७५ को तुलनामा आर्थिक वर्ष २०७५÷७६ मा १७ लाख ४२ हजार युनिट विद्युत् घटेको हो ।

नेपाल विद्युत् प्राधिकरण धुन्चे वितरण केन्द्रका अनुसार आर्थिक वर्ष २०७४÷७५ मा १ करोड २६ लाख ३८ हजार युनिट विद्युत् बिक्री भएको थियो । जसबाट एक करोड १५ लाख १३ हजार रुपयाँ रकम सङ्कलन गरेको थियो ।

आर्थिक वर्ष २०७५÷७६ मा १ करोड ८ लाख ९६ हजार युनिट विद्युत् मात्रै बिक्री भएको छ । जसबाट १ करोड २ लाख ७ हजार रुपयाँ सङ्कलन भएको छ । रसुवागढी जलविद्युत् आयोजनाको खपत युनिट घटेकाले जिल्लाको खपत युनिट पनि घटेको केन्द्र प्रमुख कृष्णहरि दाहालले बताउनुभयो । जिल्लामा ८ हजार २ सय १८ ग्राहक रहेका छन् ।