रसुवाको टिमुरेबाट बहुविवाह मुद्दाका फरार थुनुवा पक्राउ

नुवाकोट । काठमाडौँको जगन्नाथदेवल (सुन्धारा) स्थित कारागारबाट भागि फरार रहेका बहुविवाह मुद्दाका एक थुनुवालाई प्रहरीले रसुवाको टिमुरेबाट पक्राउ गरेको छ।

पक्राउ पर्नेमा रसुवा जिल्लाको आमाछोदिङ्मो गाउँपालिका वडा नं. १ स्थायी घर भएका २८ वर्षीय बुद्धिराज तामाङ रहेका छन्।

जिल्ला अदालत काठमाडौँको आदेशले बहुविवाह सम्बन्धी कसुर मुद्दामा पुर्पक्षका लागि जगन्नाथदेवल कारागारमा रहेका तामाङ ‘Gen-Z आन्दोलन’ को क्रममा कारागारबाट भागेका थिए।

खोजतलासको क्रममा इलाका प्रहरी कार्यालय टिमुरे, रसुवाबाट खटिएको प्रहरी टोलीले यही भदौ ३ गते गोसाईकुण्ड गाउँपालिका वडा नं. २ टिमुरे बजारमा हिँडिरहेको अवस्थामा उनलाई फेला पारी नियन्त्रणमा लिएको हो।

नियन्त्रणमा लिइएका तामाङलाई पुनः थुनामा राख्नका लागि भदौ ३ गते नै कारागार कार्यालय धुन्चे, रसुवामा बुझाइएको जिल्ला प्रहरी कार्यालय रसुवाका सूचना अधिकारी प्रहरी निरीक्षक डिल्ली राज सापकोटाले जानकारी दिएका छन्।