बिगबसमा चम्किए सन्दीप

नेपाली युवा क्रिकेटर सन्दीप लामिछाने अस्ट्रेलियामा जारी बिगबस टी–२० लिगमा चम्किएका छन् । उनले पहिले खेलमै २ विकेट लिएर उत्कृष्ट प्रदर्शन गरिरहेका छन् ।

सिड्नी थन्डरविरुद्ध बलिङ गरेका उनले आफ्नो पहिलो ओभरमै कप्तान सेन वाट्सनलाई क्याच आउट गराए । डेब्यु खेलको पहिलो ओभरको दोस्रो बलमै वाट्सनलाई आउट गरेका सन्दीप त्यतिमै रोकिएनन् ।

उत्कृष्ट प्रदर्शनलाई निरन्तरता दिँदै उनले सोही ओभरको अन्तिम बलमा क्यालुम फर्गुसनलाई पनि आउट गरे । वाट्सन २२ र फर्गुसन १५ रन बनाएर खेलीरहेका थिए ।

पहिलो ओभरमा ३ रन खर्च गरेर २ विकेट लिँदै कसिलो बलिङ गरेका उनलाई त्यसपछिका ओभर भने महंगा भए । सन्दीपले त्यसपछि दोस्रो ओभरमा ६, तेस्रोमा १३ तथा चौथोमा १४ रन खर्चिएका थिए ।