भोटेकोशीको बाढीमा अस्ताए खेलप्रेमी खतिवडा

नुवाकोट । भोटेकोशी हुँदै त्रिशूली नदीमा आएको विनाशकारी बाढीले नुवाकोट क्रिकेट स‌घका सचिव करण खतिवडाको मृत्यु भएको छ।

बाढीपछि सम्पर्कविहीन भएका नुवाकोट क्रिकेट संघका सचिव करण खतिवडालाई परिवारले मृत घोषणा गरेका हुन् । त्रिशूली बजार निवासी खतिवडा भदौ १० गते आफ्नी आमासंगै त्रिशुली बजारस्थित पसलमा रहेका बेला बाढीमा परेका थिए।

भोटेकोशी र त्रिशूली नदीमा आएको भीषण बाढीपछि उनी सम्पर्कविहीन बनेका हुन् । लामो समयसम्म सम्पर्कमा नआएपछि बाढीमा परी उनको ज्यान गएको हुन सक्ने निष्कर्षमा पुगिएको संघका अध्यक्ष दुर्गाराज पाठकले बताएका छन्।

खतिवडा नुवाकोट क्रिकेट संघका वर्तमान सचिवका रूपमा जिल्लाको क्रिकेट गतिविधिमा सक्रिय थिए। खेलाडीको रूपमा समेत पहिचान बनाएका उनले नुवाकोटमा क्रिकेटको विस्तार, नयाँ खेलाडीलाई प्रोत्साहन र खेल गतिविधिको व्यवस्थापनमा महत्वपूर्ण भूमिका खेलेको अध्यक्ष पाठकले बताए ।

संघका अध्यक्ष पाठकले खतिवडाको योगदान र खेलप्रतिको समर्पणलाई नुवाकोटको क्रिकेट क्षेत्रले लामो सम्झिरहने बताए ।

उनकाे १३ औ दिनको पुन्यतिथी समेत आज सम्पन्न गरिएको छ ।