एकीकृत तथ्याङ्क संकलन गर्न भोटेकोशी–त्रिशूली बाढी पीडितको माग

विदुर खबर २०८३ मंसिर ६ गते २२:१४

नुवाकोट । गत भदौ १० गते भोटेकोशी–त्रिशूली नदीमा आएको विनाशकारी बाढीबाट प्रभावित नुवाकोटको विदुर नगरपालिका–५ का बाढी पीडितहरूले राहत र सहयोगका नाममा बारम्बार फारम भर्नुपर्दा आफूहरू दोहोरो मारमा परेको गुनासो गरेका छन् ।

बाढी पीडित नविन चित्रकारले शुक्रबार (मंसिर ५ गते) विदुर नगरपालिकाका नगर प्रमुख र वडा नं. ५ का वडा अध्यक्षसमक्ष लिखित निवेदन बुझाउँदै सम्पूर्ण पीडितहरूको एकीकृत, पारदर्शी र आधिकारिक तथ्याङ्क संकलन गरी अद्यावधिक गरिदिन माग गरेका हुन् ।

निवेदनमा राहत, पुनर्निर्माण र सहयोगका लागि आउने विभिन्न संघ–संस्था तथा निकायहरूलाई छुट्टाछुट्टै विवरण बुझाउँदा हालसम्म एउटै परिवारले ३० देखि ३५ वटासम्म फारम भरिसकेको उल्लेख छ ।

अझै पनि विभिन्न संस्थाहरू आउने क्रम जारी रहेकाले प्रत्येक पटक छुट्टाछुट्टै फारम भर्न धाउनुपर्दा पीडितहरूको अमूल्य समय, श्रम र मानसिक शान्ति खलबलिएको चित्रकारले बताएका छन् ।

फरक–फरक निकायले अलग–अलग तथ्याङ्क संकलन गर्दा वास्तविक पीडितहरू छुट्ने र कतिपय दोहोरिने जोखिम बढेको पीडितहरूको भनाइ छ ।

स्थानीय सरकारले एकैपटक आधिकारिक तथ्याङ्क प्रमाणीकरण गरी एकद्वार प्रणालीमार्फत सहयोगी संघ–संस्थाहरूलाई उपलब्ध गराउने व्यवस्था मिलाए राहत वितरण छिटो, व्यवस्थित र न्यायोचित हुने निवेदनमा उल्लेख छ ।

प्रतिक्रिया