म्यानचेस्टर सिटीका म्यानेजरविरुद्ध राजनीतिक सन्देश दिएको आरोप

१२ फागुन, काठमाडौं । राजनीतिक सन्देश दिने पहेंलो रिबन लगाएको भन्दै म्यानचेस्टर सिटीका म्यानेजर पेप गार्डिवलाविरुद्ध उजुरी दर्ता भएको छ । फुटबल एसोसिएशन (एफए)ले फुटबलको नियम उल्लंघन गरेको भन्दै गार्डिवलाविरुद्ध उजुरी दर्ता गरेको हो ।

क्याटलोनिया स्वतन्त्रताको पक्षका नेताहरुलाई बन्धक बनाइएको विरोधमा गार्डिवलाले छातिमा पहेंलो रिबन लगाउँदै आएका छन् ।

गार्डिवला पनि क्याटलोनियाकै हुन् । स्पेनबाट अलग हुनका लागि क्याटलोनियामा जनमत संग्रह भएको थियो जसमा स्वतन्त्रताको पक्षमा बहुमत आएको थियो । तर स्पेनले त्यसलाई गैरकानुनी भन्दै हस्तक्षेप गरेर प्रत्यक्ष केन्द्र शासन लागू गरेको थियो । त्यसक्रममा स्वतन्त्रता आन्दोलनका नेताहरु समेत पक्राउ परेका छन् । ति नेताहरुको समर्थनमा गार्डिवलाले पहेंलो रिबन लगाउँदै आएका छन् ।

गार्डिवलालाई पहेंलो रिबन नलगाउन यसअघि एफएले चेतावनी दिँदै आएको थियो । तर, त्यसलाई अटेर गरेको भन्दै आरोप दर्ता भएको हो जसमा उनले आगामी मार्च ५ तारिकभित्र स्पष्टीकरण दिनुपर्ने छ ।