रसुवामा मतदान अधिकृतलाई तालिम

विदुर खबर २०७९ कार्तिक ३० गते १४:१४

रसुवा। मंसिर ४ गते हुने प्रतिनिधिसभा तथा प्रदेशसभा सदस्य निर्वाचनमा खटिने मतदान अधिकृत र सहायक मतदन अधिकृतलाई तालिम दिइएको छ ।

जिल्ला निर्वाचन कार्यालय रसुवाले सोमबार र मंगलबार गरी निर्वाचनमा खटिने मतदान अधिकृत र सहायक मतदान अधिकृतलाई तालिम दिएको हो ।

सदरमुकाम धुन्चेमा रहेको जिल्ला समन्वय समितिको हलामा राखेर तालिम दिएको जिल्ला निर्वाचन अधिकारी श्रीराम थापाले बताए । ‘तालिममा निर्वाचन आचारसंहिता, मतदानस्थलमा पुगेपछिको काम, कर्तव्य, अधिकारको बारेमा जानकारी गराइएको थियो,’ उनले भने ।

प्रतिनिधिसभा तथा प्रदेशसभा निर्वाचन कानुन र आचारसंहिताको विषयमा मुख्य निर्वाचन अधिकृत तथा जिल्ला न्यायाधीश रामचन्द्र पौडेलले सहभागीहरुलाई जानकारी गराएका थिए । तालिममा ५६ मतदन अधिकृत र ५६ जना सहायक मतदान अधिकृत सहभागी थिए ।

प्रमुख जिल्ला अधिकारी नवराज जैसीले मतदान पूर्वका व्यवस्थापकीय पक्षको विषयमा प्रस्तुत गरेका थिए । निर्वाचान कार्यालयका अनुसार रसुवा जिल्लामा कारागार र जिल्ला समन्वय समितिमा अस्थायी मतदान केन्द्र थप भएसँगै ३६ मतदानस्थल र ५४ वटा मतदान केन्द्र छ । रसुवामा ३९ हजार ४ सय ५९ मतदाता रहेका छन् । जसमध्ये महिला १९ हजार ३ सय ४० पुरुष २० हजार १ सय १८ र अन्य १ जना रहेका छन् ।