मैलुङ स्याफ्रु सडक एक साताभित्र सञ्चालनमा आउने

नुवाकोट । रसुवागढी नाका जोड्ने छोटो दूरीको मैलुङ स्याफ्रु सडक एक साताभित्र सञ्चालनमा आउने भएको छ । 

बर्खाको कारण गएको असार १ गतदेखि अवरुद्ध भएको सडक एक साताभित्र सञ्चालनमा ल्याउन लागिएको हो । गल्छी–त्रिशूली–मैलुङ–स्याफ्रुबेंसी–रसुवागढी सडक योजनाका अनुसार सडक खुलाउनका लागि काम अघि बढिसकेको छ ।

मैलुङदेखि स्याफ्रुबेसीसम्मको सडकमा झरेको पहिरो हटाउने, ठुलाठुला ढुंगा फुटाउनका लागि ब्लाष्टिङ गर्ने, नदी कटान गरेको क्षेत्रमा नयाँ बाटो बनाउने लगायतका काम गर्नुपर्ने योजना प्रमुख नारायणदत्त भण्डारीले बताउनुभयो । स

डक खण्डको चार ठाउँमा ब्लाष्टिङ गर्नुपर्ने देखिएको छ । ‘ब्लाष्टिङ गर्नुपर्ने क्षेत्रमा होल खोप्ने काम भइरहेको छ’, उहाँले भन्नुभयो, ‘ब्लाष्टिङको लागि स्वीकृति आउन बाँकी छ ।’ स्वीकृति आउना साथ ब्लाष्टिङ सुरु हुने छ ।

ब्लाष्टिङको कार्य सकिएपछि पहिरो हटाउने तथा नदीले कटान गरेको क्षेत्रमा नयाँ बाटो बनाउने काम अघि बढ्ने उहाँले बताउनुभयो ।

त्यसैगरी योजनाको अनुरोधमा माथिल्लो त्रिशूली एक (२१६) जलविद्युत् आयोजनाले त्रिशूली खोलामा बेलीब्रिज हालिसकेको छ । सडक सञ्चालनमा ल्याएपछि स्तरोन्नतिको कामले निरन्तरता पाउने छ ।

बर्खाको कारण सडकको विभिन्न स्थानमा पहिरो गएको र जोखिम बढेका कारण गएको जेठ अन्तिमबाट स्तरोन्नतिको काम रोकिएको थियो ।
बर्खा अगाडि ग्याबिन लगाउने, सडक चौडा गर्ने, पर्खाल लगाउने काम भइरहेको थियो ।

हालसम्म यो सडकको स्तरोन्नतिको काम १५ प्रतिशत सकिएको छ । यो सडक खण्डको स्तरोन्नतिको काम गएको तिहार पछि सुरु भएको थियो ।