सान्जेन र रसुवागढीद्वारा जिल्लाबासीको लागि सेयर निष्कासन गर्न प्रस्ताव

विदुर खबर २०७७ असोज २० गते २०:२८

रसुवा ।  विश्वव्यापी फैलिएको कोरोना भाइरस (कोभिड–१९) को कारण रोकिएको सेयर निष्कासन प्रक्रिया अघि बढाउन जलविद्युत् कम्पनीहरूले प्रस्ताव गरेका छन् ।

Advertisement

रसुवागढी र सान्जेन जलविद्युत् कम्पनी लिमिटेडले जिल्लाबासीका लागि निष्कासन प्रक्रिया अघि बढाउने प्रस्ताव गरेका हुन् ।जिल्ला समन्वय समिति रसुवाले आयोजना गरेको वार्षिक समीक्षा तथा जिल्ला सभामा सान्जेन जलविद्युत् कम्पनी लिमिटेडका कार्यकारी निर्देशक किरण कुमार श्रेष्ठले सेयर निष्कासनको प्रस्ताव गरेका थिए । उनले सेयर भर्ने समयसीमा बढी राखेर सेयर निष्कासन गर्नका लागि प्रस्ताव गर्दै यसका लागि आवश्यक समन्वय गरिदिन जिल्ला समन्वय समितिलाई आग्रह गरेका थिए । अहिले प्रक्रिया अघि बढाएपनि सबै प्रक्रिया पूरा गरेर सेयर निष्कासन गर्न कम्तिमा ६ महिना लाग्ने भएकाले प्रस्ताव गरिएको कम्पनीहरूले जनाएका छन् ।

यी दुवै कम्पनीले यसअघि नै सेयर निष्कासन प्रक्रिया अघि बढाएका थिए । पछि कोभिड–१९ का कारण प्रक्रिया रोकिएको हो । जिल्लाबासीका लागि रसुवागढीले ६८ लाख ४२ हजार सय कित्ता र सान्जेनले ३६ लाख ५० हजार कित्ता सेयर निष्कासन गर्ने छ । कम्पनीले पहिले नै सेयर निष्कासनका लागि प्रभावितलाई वर्गीकरण गरिसकेको थियो ।
रसुवागढीले अति प्रभावितका लागि ४.५, प्रभावितका लागि १.५ र सामान्य प्रभावितका लागि १ प्रतिशत र सान्जेनले अति प्रभावितका लागि ४.२५, प्रभावितका लागि ३,

Advertisement

सामान्य प्रभावितका लागि १.५ र न्यून प्रभावितका लागि १ प्रतिशतका दरले सेयर निष्कासन गर्ने तयारी गरेका थिए । स्थानीयका लागि पहिलो पटक चिलिमे जलविद्युत् आयोजनाले सेयर निष्कासन गरेको थियो । रसुवाको गोसाइँकुण्ड गाउँपालिका–२, टिमुरेमा निर्माण भइरहेको १११ मेगावट क्षमताको रसुवागढी जलविद्युत् आयोजनाको ७८ प्रतिशत काम सकिएको छ । त्यसैगरी सान्जेन जलविद्यत् कम्पनी अन्तर्गत आमाछोदिङ्मो गाउँपालिका–५ मा १४.८ मेगावट क्षमताको माथिल्लो सान्जेन र ४२.५ मेगावट क्षमताको सान्जेन जलविद्युत् आयोजना निर्माण हुँदै छ ।

जसमा माथिल्लो सान्जेनको ८७ प्रतिशत र सान्जेनको ७८ प्रतिशत काम सकिएको छ ।

Advertisement

प्रतिक्रिया