आर्सनल युरोपा लिगको क्वाटरफाइनलमा

एजेन्सी । इंग्लिश क्लब आर्सनल युरोपा लिग फुटबलको क्वाटरफाइनलमा प्रवेश गरेको छ । बुधबार राति भएको अन्तिम १६ को दोस्रो लेगमा इटालियन क्लब एसी मिलानलाई ३ – १ ले हराउँदै समग्रमा ५ – १ को जितसहित आर्सनलले क्वाटरफाइनलमा स्थान पक्का गरेको हो ।

घरेलु मैदानमा भएको दोस्रो लेगमा आर्सनललाई जित दिलाउन ड्यानी वेलब्याकले दुई तथा ग्रानिट झाकाले एक गोल गरे । एसी मिलानका काल्हानोलुले एक गोल फर्काए । यसअघि एसी मिलानको घरेलु मैदानमा भएको पहिलो लेगमा आर्सनल २ – ० ले विजयी भएको थियो ।

इमिरेट्स स्टेडियममा सुरुवाती अग्रता भने पाहुना टोली एसी मिलानले लिएको थियो । खेलको ३५ औं मिनेटमा काल्हानोलुले गोल गर्दै एसी मिलानलाई सुरुवाती अग्रता दिलाए । तर, खेलको ३९ औं मिनेटमा आर्सनलका वेलब्याकले गोल गर्दै खेल १ – १ को बराबरीमा ल्याए ।

पहिलो हाफमा १ – १ गोलको बराबरीमा सकिएको खेलको दोस्रो हाफमा आर्सनलले दुई गोल गरेको थियो । खेलको ७१ औं मिनेटमा झाकाले गोल गर्दै आर्सनललाई २ – १ को अग्रता दिलाए । त्यसपछि खेलको ८६ औं मिनेटमा वेलब्याकले पेनाल्टीबाट व्यक्तिगत दोस्रो गोल गर्दै आर्सनललाई ३ – १ को जित दिलाए ।