रसुवा । कुलमान घिसिङलाई नेपाल विद्युत प्राधिकरणको कार्यकारी निर्देशकमा फेरि नियुक्त गर्न माग गर्दै रसुवाको बिभिन्न ठाउँमा युवाहरूले शान्तिपूर्ण प्रदर्शन गरेका छन् ।

जिल्ला सदरमुकाम धुन्चे सहित बेत्रावती,कालिकास्थान, स्याफ्रुबेशी लगायतको स्थानमा प्रदर्शन भएको छ । स्वतन्त्र नागरिक समूहले शान्तिपुर्ण प्रदर्शन गरेका हुन् । विभिन्न प्ले-कार्ड बोकेका युवाहरूले सरकारले कुलमानमाथि न्याय गर्न नसकेको भन्दै नाराबाजी पनि गरेका थिए ।

युवाहरुको समूहले कुलमानको पुनः नियुक्तिमा ढिलाइ भएको भन्दै सरकारविरुद्ध नाराबाजी गरेका हुन् । उनीहरुले कुलमानलाई फेरि प्राधिकरणमा जिम्मेवारी दिने गरी निर्णय गर्न सरकारको ध्यानाकर्षण गराएका छन् । घिसिङ बुधबार प्राधिकरणबाट बिदाइ भएका थिए।