रसुवामा संचालित सार्वजनिक सवारीसाधनको भाडा घट्यो

रसुवा असार ३०, रसुवामा सञ्चालन हुने सार्वजनिक सवारी साधनको भाडा घटाइएको छ ।

साउन १ गतेदेखि लागू हुने गरि काठमाडौँदेखि कालिकास्थानसम्म १५ प्रतिशत र जिल्लाको अन्य क्षेत्रमा ५ प्रतिशत भाडा घटाउने सहमति भएको हो । शनिबार जिल्ला प्रशासन कार्यालय रसुवामा बसेको विद्यार्थी संगठन र व्यवसायी बीचको छलफलले भाडा घटाउने सहित तीन बुँदे सहमति भएको प्रमुख जिल्ला अधिकारी अर्जुन भण्डारीले बताउनुभयो । सहमति अनुसार असार २९ गतदेखि विद्यार्थी, अपांगता भएका व्यक्ति र जेष्ठ नागरिकलाई छुटको व्यवस्था गर्ने, सवारीको भाडा घटाउने र नेपाल सरकारले विभिन्न समयमा जारी गर्ने वैज्ञानिक भाडा दरलाई कार्यान्वयन गर्ने सहमति भएको हो ।

जिल्लामा रहेका अखिल नेपाल राष्ट्रिय स्वतन्त्र विद्यार्थी युनियन, अनेरास्ववियू (क्रान्तिकारी) र नेपाल विद्यार्थी संघका विद्यार्थी र पासाङ ल्हामु यातायात, केरुङ यातायात र टिमुरे यातायातका व्यवसायी बीच छलफल भएको थियो । वैज्ञानिक भाडा दर कायम हुनेपर्ने, पुराना सवारी साधन सञ्चालन रोकिनु पर्ने, टाइम कार्ड लागू हुनुपर्ने लगायतका माग राख्दै विद्यार्थी संगठन आन्दोलित भएका थिए । काठमाडौँबाट कालिकास्थानसम्म १५ प्रतिशत र जिल्लाको अन्य स्थानमा ५ प्रतिशत भाडा घटाउने सहमति भएको अनेरास्ववियू (क्रान्तिकारी) रसुवाका अध्यक्ष अर्जुन पौडेलले बताउनुभयो ।

स्थानीय रुटमा सञ्चालन हुने सवारी साधनको भाडादर समायोजन गरी १५ दिन भित्र सार्वजनिक गरिने छ । रसुवा खण्डमा सञ्चालन हुने सवारीले मनोमानी तरिकाले भाडा लिने गरेको कारण जिल्लामा सञ्चालन हुने सवारीको भाडा समायोजन गर्न लागिएको नेपाल विद्यार्थी संघ रसुवाका कोषाध्यक्ष सन्दीप पौडेलले बताउनुभयो ।