चिलिमेकाे प्रमुख कार्यकारी अधिकृतमा माधवप्रसाद कोइराला

नुवाकोट, नेपाल विद्युत प्राधिकरण ११अाैं तह (निर्देशक) का कर्मचारी माधवप्रसाद कोइराला चिलिमे जलविद्युत कम्पनीको प्रमुख कार्यकारी अधिकृत (सिइअाे) नियुक्त भएका छन् ।

प्राधिकरणकाे ५१ प्रतिशत स्वामित्व रहेकाे कम्पनीमा उनलार्इ उक्त जिम्मेवारी दिइएकाे हाे । काेइराला अहिले रसुवागढी हाइड्राे पावर कम्पनीमा कम्पनीमा सिइअाेकाे रूपमा कार्यरत छन् । उनलार्इ यहाँकाे जिम्मेवारी पनि सम्हाल्ने गरी चिलिमेकाे सिइअाे नियुक्त गरिएकाे हाे । यसअघि उक्त जिम्मेवारीमा रहेका दामोदरभक्त श्रेष्ठले अवकास पाइसकेका छन् । प्राधिकरणले मंगलबार काेइरालालार्इ चिलिमेमा नियुक्त भएकाे पत्र दिएकाे थियाे ।

उनी बुधबारबाट त्यहाँ हाजिर भएका छन् । आफ्नो कार्यकालमा चिलिमेअन्तर्गत निर्माणाधीन २ सय ७० मेगावाटका आयोजना सम्पन्न गर्ने तथा नयाँ आयोजनाको निर्माण प्रक्रिया अघि बढाउने उनले बताए । ‘चिलिमेका ४ आयोजना चाँडो सम्पन्न गर्ने जिम्मवारीलाई प्राथमिकता दिन्छु,’उनले भने, ‘अहिले अध्ययनको क्रममा रहेका आयोजना निर्माणको चरणमा पुर्याउन पनि मेरो भूमिका रहनेछ ।’ २०४८ सालमा इन्जिनियरको रुपमा ७ तहबाट नेपाल विद्युत प्राधिकरणमा सेवा सुरु गरेका कोइरालासँग चिलिमे कम्पनीमा काम गरेको लामो अनुभव छ । २०५० सालमा कम्पनी स्थापना भएयता उनी चिलिमेसँग जाेडिएका थिए ।

२२ मेगावाटकाे चिलिमे जलविद्युत अायाेजनाकाे सफल निर्माण गर्नमा उनकाे पनि याेगदान छ ।  अायाेजना पूरा भएपछि २०६५ सालमा काेइरालाकाे नेतृत्वमा १ सय ११ मेगावाटकाे रसुवागढी अायाेजनाकाे पहिचान गरी विकास प्रक्रिया अघि बढेकाे थियाे । अायाेजना अघि बढाउन २०६८ सालमा रसुवागढी हाइड्राे पावर कम्पनी स्थापना गरेर उनलार्इ कायर्कारी निर्देशककाे जिम्मेवारी दिइएकाे थियाे ।