पारस खड्का बागमती प्रदेश क्रिकेट संघको अध्यक्षमा निर्वाचित

राष्ट्रिय क्रिकट टिमका पूर्वकप्तान पारस खड्का वाग्मती प्रदेश क्रिकेट संघका अध्यक्षमा निर्वाचित भएका छन् ।

उनी शुक्रबार धोवीघाट, ललितपुरमा आयोजित निर्वाचनमा उमेश पियालाई ९ मतले पराजित गर्दै प्रदेश अध्यक्ष चुनिएका हुन् ।काठमाडौं जिल्ला क्रिकेट संघका सदस्य भएपछि प्रदेशका ६ वटा जिल्ला संघमध्ये चार जिल्ला (काठमाडौं, भक्तपुर, ललितपुर र मकवानपुर) को समर्थनमा वाग्मती प्रदेश अध्यक्षमा उम्मेदवारी दिएका खड्काले २३ मत प्राप्त गरे भने पियाले १४ मत मात्रै पाए ।

नेपाल क्रिकेट संघको निर्वाचन असोजमा हुँदैछ, जसमा वर्तमान अध्यक्ष चतुरबहादुर चन्द नेतृत्वमा दोहोरिन चाहन्छन् भने कोषाध्यक्ष रोशन सिंह अध्यक्षमा चन्दलाई चुनौती दिने तयारीमा छन् । यसबीचमा काठाडौं जिल्ला संघका अध्यक्ष दीवाकर घलेसँगको समन्वयमा पारस खड्का समूह पनि बलियो बनेको छ । जिल्लादेखि प्रदेश निर्वाचनमा चन्द–खड्का समूह एकसाथ उभिएको छ भने उसलाई सिंह समूहले चुनौती दिइरहेको छ । यसको प्रत्यक्ष प्रभाव वाग्मती प्रदेश संघको निर्वाचनमा देखियो ।

वाग्मती प्रदेशको १३ सदस्यीय कार्यसमितिको निर्वाचनमा चन्द–खड्का प्यानलबाट १२ जनाले उम्मेदवारी दिएका थिए र उनीहरू सबैले कुल ३७ भोटमध्ये २३ भोट प्राप्त गर्दै जित हात पारे । सिंह पक्षबाट एक सदस्य मात्रै चुनिए । जसमा अनुजमान श्रेष्ठ (नुवाकोट) रहे । कार्यसमितिमा प्रत्येक जिल्लाको प्रतिनिधित्व हुनुपर्ने प्रावधानमा परेका उनी १६ मत पाएर पनि निर्वाचित भएका हुन् ।

चन्द–खड्का प्यानलबाट उपाध्यक्षमा मकवानपुरका प्रेमबहादुर क्षत्री, सचिवमा ललितपुरका प्रसन्न शाक्य, कोषाध्यक्षमा भक्तपुरका सन्जय बस्नेत निर्वाचित भए ।

त्यस्तै, अनिल अधिकारी (चितवन), सुजन महर्जन (ललितपुर), शेखर श्रेष्ठ (ललितपुर), सन्जोग पोखरेल (मकवानपुर), वसन्तराज सत्याल (काठमाडौं), धिरज श्रेष्ठ (मकवानपुर) र अजयवीर पाण्डे (काठमाडौं) सदस्यमा चुनिए । महिला सदस्यमा नीरा राजोपाध्याय निर्विरोध भइन् । उनी राष्ट्रिय महिला क्रिकेट टिमकी पूर्वकप्तान हुन् ।