‘झण्डै पहिरोमा पुरिएन बल्ल बल्ल बाँचियो,’ उनले भने । पहिरोले नौबिसेमा रहेका केही घरमा क्षति पुगेको छ । नौबिसेका पहिरो प्रभावितहरु उत्तरगया गाउँपालिका–४ माथिल्लो पैरेबेसीबाट विस्थापित भएर आएका हुन् ।

Advertisement

२०७२ सालको भूकम्पले थातथलोमा पहिरो गएपछि विस्थापित भएर १७ घरपरिवार उत्तरगया गाउँपालिका–५, नौबिसेमा बस्दै आएका हुन् । पहिले पनि पहिरोका कारण गाउँमा बस्न नसकेर बेसी झरेको उनीहरू बताउँछन् ।

पहिरोले करिब एक सय रोपनी खेत बगाएको स्थानीयहरूको भनाइ छ । पहिरोले पासाङ ल्हामु मार्गको बेत्रावती–कालिकास्थान सडक खण्ड अवरुद्ध छ । पहिरोले धेरै ठाउँमा क्षति गरेकाले सडक पुन: निर्माण हुन एक महिना लाग्न सक्ने बताइएको छ ।

पासाङ ल्हामु मार्ग उत्तरी नाका रसुवागढी पुग्ने सडक पनि हो । पहिरोका कारण रसुवागढी नाकाबाट समान लोड भएर आएका कन्टेनर तथा ठूला सवारी साधन बाटोमै रोकिएका छन् ।

साना चार चक्के सवारी साधन र मोटर साइकललाई वैकल्पिक सडकबाट चल्ने व्यवस्था मिलाइएको प्रमुख जिल्ला अधिकारी नवराज जैशीले बताए । तीर्थयात्रुले आवतजावत गर्ने मुख्य दिन नै सडक अवरुद्ध हुँदा उनीहरूको यात्रा प्रभावित भएको छ । प्रजिअ जैशीका अनुसार बुधबार बिहानदेखि नै उत्तरगया गाउँपालिका–५ पालेकोवन जिरो किलो हुँदै तारुके, बेल्चौर धारापानी जोड्ने सडकलाई वैकल्पिक रुटको रुपमा प्रयोग गरिएको छ ।

बस चढेर गोसाईंकुण्ड मेलामा जाने-आउने तीर्थयात्रीहरूलाई एक बसबाट अर्को बसमा पल्टी गर्ने व्यवस्था गरिएको पनि प्रजिअ जैशीले बताए । पहिरोले मानवीय क्षति नभए पनि २५ घरपरिवार जोखिममा रहेका छन् ।

जोखिममा रहेका घरपरिवारलाई सुरक्षित स्थानमा गएर बस्न अनुरोध गरिएको छ । जोखिममा रहेका घरलाई संरक्षण गर्न तत्कालै तार जाली लगाउने व्यावस्था गर्न सडक डिभिजन कार्यालय नुवाकोटलाई भनिसकेको प्रजिअ जैसीले बताए ।

वर्षा रोकिएपछि बेत्रावती–मैलुङ–स्याफ्रुबेसी सडक सञ्चालनमा ल्याइने पनि जैशीले बताए । उक्त सडक सञ्चालनमा आएपछि रसुवागढी नाकाबाट आएका सवारी साधनलाई सहज हुनेछ । अहिले उक्त सडक खण्ड पनि पहिरोको जोखिममा छ । सडकलाई जतिसक्दो छिटो खुलाउने प्रयास भइरहेको सडक डिभिजन कार्यालय नुवाकोटका प्रमुख अमृतमणि रिमालले बताए ।