नुवाकोटमा राहदानी बढाउनेको संख्या बढ्यो

नुवाकोट । नुवाकोट जिल्लामा राहदानी बनाउनेहरुको संख्या बढ्दै गएको छ ।

जिल्ला प्रशासन कार्यालय नुवाकोटले गत आर्थिक वर्षमा राहदानी बनाउनेहरुबाट साढे दुई करोड राजश्व सकलन गरेको छ ।गत साउनदेखि जेठ सम्ममा साढे दुई करोड राजश्व संकलन भएको प्रमुख जिल्ला अधिकारी नारायण रिसालले जानकारी दिए ।

११ महिनाको अवधिमा जिल्लाबाट ४ हजार ६ सय ४० ओटा राहदानीको लागि फारम संकलन गरेकोमा ४ हजार एक सय १७ ओटा राहदानी वितरण गरिएको थियो ।

पछिल्लो समय नेपाल छाडेर रोजगारीका लागि विदेशीनेहरुको संख्या बढेको छ । दुईवर्षदेखि कोरोनाका कारण विदेश जान नपाएकाहरु आजभोलि भने जान थालेका छन । यसले बैदेशिक रोजगारमा जानेको संख्या बढ्दै गएको छ ।

बैदेशिक रोजगार विभागका अनुसार प्रत्येक दिन १५ सयको हाराहारीमा युवाहरु विदेशीने क्रम बढेको छ । जसका कारण नेपालमा पछिल्लो समय रेमिट्यान्स पनि बढेको छ ।

प्रशासन कार्यालयले राष्ट्रिय परिचयपत्रका लागि १३ हजार ८ सय ४३ ओटा फर्म संकलन गरेको जनाएको जनाएको छ ।