सडकको भल घरभित्र पस्दा लिखुका नारायणको विजोक

नुवाकोट । शनिवार विहान परेको वर्षाको कारण नुवाकोटको लिखु गाउँपालिका वडा नम्बर ३ का नारायण श्रेष्ठको घरभित्र सडकको भल पस्दा विजोक भएको छ ।

भालडाँडा सडकबाट आएको पहिरोसहितको लेदो खरमा पस्दा उनको चारकोठे पक्की भवन भएको घर, शौचालय र एउटा पुरानो घरमा क्षति पुगेको पिडित नारायण श्रेष्ठले जानकारी दिए ।

उनले सडकबाट आएको लेदो घरभित्र पस्दा घरका सबै खाद्यान्न, लुगाफाटामा क्षति पुगेको बताए । भालडाँडा जाने गाउँमा नयाँ सडकको ट्रयाक खोल्दा सडकबाट निस्किएको ढुङगा माटोले खहरे खोला पुरिएपछि सडकबाट आएको ढुङ्गा माटोसहितको पानीको भल कोठामा छिरेको उनले बताए ।

यस विषयमा गाउँपालिकाका अध्यष धुव्र श्रेष्ठलाई जानकारी गराएको उनले बताए । गाउँपालिकाका अध्यक्ष श्रेष्ठले भल पसेको घरको अनुगमनको लागि आईतवार विहान पिडितको घर जाने बताएका छन् ।