रसुवामा मुख्य सिजनमै आएनन् पर्यटक

नुवाकोट । पर्यटकीय सिजन सुरु भइसक्दा समेत पर्यटकीय क्षेत्रहरूमा पर्यटक आउने क्रम अझै सुरु भएको छैन ।

विश्वव्यापी फैलिएको कोरोना भाइरसका कारण सिजनमा पर्यटक नआएका हुन । गोसाइँकुण्ड मेला र त्यसपछिका दिनमा थोरै संख्यामा मात्रै नेपाली पर्यटक आएका थिए । पछिल्लो समय पर्यटकको आगमन घट्दै गएको लाङटाङ राष्ट्रिय निकुञ्जले जनाएको छ ।

कोरोना सुरु हुनुभन्दा पहिले पर्यटकीय क्षेत्रहरूमा विदेशी तथा नेपाली पर्यटक आउने क्रम बढ्दै गएको थियो । निकुञ्ज क्षेत्रभित्र रहेका पर्यटकीय क्षेत्रको अध्ययन तथा अवलोकनका लागि प्रत्येक वर्ष हजारा पर्यटक आउने गरेका छन् ।

निकुञ्ज आएका पर्यटकमध्ये पर्यटकीय क्षेत्र लाङटाङ, धार्मिकस्थल गोसाइँकुण्ड र तामाङ सम्पदा मार्गको अध्ययन, अवलोकन गर्न पुग्ने गरेका छन् । साउनदेखि असोजसम्म निकुञ्जमा कम पर्यटक आउँछन् ।

असोज १५ गतेदेखि कार्तिक मसान्त र चैतदेखि वैशाख अन्तिमसम्म बढी पर्यटक आउने गरेका छन् । जिल्लाको पर्यटकीय क्षेत्रहरूमा बाह्रै महिना पर्यटक आउने गरेका छन् । तर तीन महिना पर्यटनको लागि उपयुक्त मौसम नहुने भएकाले कम हुने गरेको निकुञ्जले जनाएको छ ।

इजरायल, फ्रान्स, क्यानडा, जापान, इटली, अमेरिका, थाइल्याण्ड, वेलायत, कोरिया, रसिया, स्पेन, उरुग्वे, सिंगापुरलगायतका देशका पर्यटक आउने गरेका छन् । लाङटाङ राष्ट्रिय निकुञ्जमा आएका पर्यटकमध्ये करिब ९० प्रतिशत पर्यटक लाङटाङ जाने गरेका पर्यटन व्यवसायी बताउँछन् ।

जिल्लामा आएपछि लाङटाङ लगायतका एक दर्जन हिमश्रृङ्खला, गोसाइँकुण्ड लगायतका विभिन्न कुण्ड, ऐतिहासिक स्थल रसुवागढी पर्छ भने विश्वको दुर्लभ रेडपाण्डा, हिमचितुवा लगायतका जनावर पनि देख्न सकिन्छ ।