रसुवामा जनगणना २०७८ को तयारी सुरु

रसुवा । रसुवामा राष्ट्रिय जनगणना २०७८ को तयारी सुरु भएको छ । शुक्रबार जिल्ला प्रशासन कार्यालय रसुवामा एक कार्यक्रमको आयोजना गरी जनगणना संकलनका लागि आवश्यक प्रक्रिया सुरु गरिएको जनाइएको हो । 

जिल्लामा कार्यालय स्थापना गरी आवश्यक तयारीका प्रक्रिया सुरु गरिएको जनगणना कार्यालय रसुवाका प्रमुख कपिल धितालले बताए । जनगणनाका लागि जिल्लाका २७ वटा वडामा ७८ जना गणक र २१ जना सुपरीवेक्षक परिचालन हुनेसमेत उनले बताए । 

सुपरीवेक्षकहरूलाई आगामी वैशाख १६ देखि २२ गतेसम्म तालिम प्रदान गरिने भएको छ । वैशाख २६ देखि जेठ १४ सम्म घरपरिवार सूचीकरण कार्य गरिने भएको छ । जेठ १७ देखि २२ सम्म गणकहरूलाई तालिम प्रदान गरिने भएको छ । गणनाको कार्य भने जेठ २५ देखि असार ८ गतेसम्म हुने भएको जनाइएको छ । 

त्यसैगरी आगामी भदौ १ देखि संकलित जनगणनाको तथ्यांक प्रशोधन कार्य सुरु गरिने भएको छ । आगामी असोज मसान्तसम्ममा प्रारम्भिक नतिजा सार्वजनिक गर्ने र २०७९ वैशाखमा अन्तिम नतिजा सार्वजनिक गरिने राष्ट्रिय जनगणना कार्यालय रसुवाले जनाएको छ । 

जिल्लामा ६८ प्रतिशत तामाङ समुदायको बसोवास रहेकाले तथ्यांक संकलनमा भाषागत त्रुटि नहुनका लागि सोही क्षेत्रका गणक र सुपरीवेक्षकले कार्य गरेमा तथ्यपरक तथ्यांक आउने सरोकारवालाहरूले बताएका छन् । दश वर्षपछि हुन लागेको जनगणनामा तथ्यअंकमा आधारित रहेर जनगणनामा सहभागी हुन सबै नागरिकलाई आग्रह गरिएको छ । राष्ट्रिय जनगणना २०६८ अनुसार रसुवामा ४३ हजार तीन सय रहेकोमा सन् २०२१ सम्ममा ४५ हजार दुई सय पुगेको प्रक्षेपण गरिएको राष्ट्रिय जनगणना कार्यालय रसुवाले जनाएको छ । 

‘मेरो गणना : मेरो सहभागितामा’ भन्ने नाराका साथ सुरु गर्न लागिएको राष्ट्रिय जनगणनामा सहज पहुँच, उच्च नेटवर्क र व्यवस्थापनजस्ता पक्षका आधारमा ट्याबलेट र कागजी प्रश्नावली प्रणाली हुँदै विदेशस्थित कूटनीतिक नियोगमा द्वितीय गणनामार्फत राष्ट्रिय जनगणना सम्पन्न गर्ने लक्ष्य राखेको बताइएको छ ।