रसुवागढी नाका सरकारको मुख्य प्राथमिकतामा : परराष्ट्र मन्त्री ज्ञवाली

रसुवा । परराष्ट्र मन्त्री प्रदिपकुमार ज्ञवाली ज्ञवालीले रसुवागढी नाकालाई सामान्य व्यापारिक नाकाको रूपमा मात्र नलिएको बताएका छन् ।

चीनसँगको अन्तर्राष्ट्रिय व्यापारिक नाका रसुवागढी सहित नाकामा बनिरहेका पूर्वाधारको अवलोकनका लागि रसुवा आएका उनले उक्त कुरा बताएका हुन् । केरुङ काठमाडौं रेलमार्ग, अन्तरदेशीय प्रसारण लाइन निर्माण, उत्तर दक्षिण आर्थिक करिडोर निर्माण, क्रस बोर्डर इकोनोमिक जोन निर्माण लगायतका विषय सरकारको प्राथमिकतामा परेको छ । रसुवागढी काठमाडौं सडक मार्गलाई बाह्रै महिना सञ्चालन हुने बनाउनका लागि काम भइरहेको छ । भने स्याफ्रु बेत्रावती सुरुङ मार्गको अध्ययन कार्य अघि बढाइएको छ ।

कोभिड–१९ का कारण चीनबाट स्थलमार्ग हुँदै हुने आयातमा केही समस्या रहेको र त्यसको समाधानका लागि चीन सरकारसँग निरन्तर वार्ता भइरहेको उनले बताए । ‘हामीले दुई देश बीचको व्यापारका लागि उच्च स्तरमा वार्ता गरिरहेका छौं’, उनले भने, ‘विस्तारै समस्याको समाधान हुँदै जाने छ ।’ जिल्लामा नै पिसिआर जाँच गर्नका लागि प्रक्रिया अघि बढिसकेकाले पिसिआरका कारण नाकामा आयात बन्द हुने अवस्था नआउने उनको भनाइ छ ।

सडकको अवस्था र सामाग्री लोड अनलोडमा लाग्ने समय अनुसार सामग्री आयात बढाउनका लागि स्थानीय रूपमा छलफल गर्न उनले आग्रह गरे । यसका लागि स्वास्थ्य सुरक्षा मापदण्डको पालना, जिल्लामा नै आरटिपिसिआर गराउने र तीन सिफ्ट बनाएर सामग्री आयातको व्यवस्था मिलाउन सकिने छ । यी कारणले नै सामग्री आयात रोक्न पर्ने अवस्था आउन नदिन उनले आग्रह गरे । रसुवाका प्रमुख जिल्ला अधिकारी हरिप्रसाद पन्तले नाकामा आयात व्यवस्थापन, पारी रोकिएका नेपाली सवारी नेपाल ल्याउने व्यवस्था मिलाउन पर्ने र उता रोकिएका नेपालीलाई ल्याउनका लागि माथिल्लो निकायबाट पहल गर्नुपर्ने बताए ।

रसुवा भन्सारले मूल्य कम तथा गलत घोषणा गर्नेलाई निरुत्साहित गर्ने कामलाई प्राथमिकता दिएको प्रमुख भन्सार अधिकृत पुण्यबिक्रम खड्काले बताए । परराष्ट्रमन्त्री ज्ञवालीले चीन सरकारले निर्माण गर्न लागेको स्याफ्रुबेसीं–रसुवागढी सडक खण्ड, निर्माणाधीन एकीकृत भन्सार तथा सुख्खा बन्दरगाहको अवलोकन गरेका छन् ।