रसुवागढी नाकाबाट पहिलो दिन ९२ चिनियाँ पर्यटक भित्रिए

रसुवा ।  चीनसँगको अन्तर्राष्ट्रिय नाका रसुवागढीबाट भित्रने पर्यटकलाई स्वागत गरेर नेपाल भ्रमण वर्ष २०२० को सुरुवात गरिएको छ। पहिलो दिन नाकाबाट ९२ चिनियाँ पर्यटक नेपाल भित्रिएका छन्।

जिल्ला समन्वय समिति र गोसाइँकुण्ड गाउँपालिकाको संयुक्त आयोजनामा स्वागत गरिएको हो। पाँच वर्षदेखि यो नाकाबाट पर्यटक आउने क्रम बढेको कारण रसुवागढीमा कार्यक्रम सञ्चालन गरिएको हो।  पछिल्लो समय रसुवागढी नाकाको प्रयोग गरेर आउने तथा जाने पर्यटक बढेका छन्। नेपालको तेस्रो पर्यटकीय क्षेत्र रहेको यो जिल्लामा भ्रमण गर्न आउने पहिलो पर्यटकलाई गाउँपालिकाले गाडी तथा खानाको व्यवस्था गरेको छ।

वार्षिक रूपमा यो नाकाबाट ५० हजारको हाराहारीमा पर्यटक आवतजावत गर्छन्।  पर्यटकहरूको स्वागतका लागि स्थानीयहरूले आफ्नो संस्कृतिअनुसारको नाचगान गरेर स्वागत गरेका थिए। त्यसैगरी जिल्लाका पाँचवटै गाउँपालिकाले विभिन्न कार्यक्रम सञ्चालन गरेका छन्।  जिल्लामा पर्यटक भित्राउन तथा आएका पर्यटकको बसाई लम्बाउनका लागि गाउँपालिकाले विभिन्न योजना बनाएका छन्।