दुप्चेश्वरको एक सामाजिक संस्थालाई खड्काको सहयोग

नुवाकोट । नेकपा एमाले नुवाकोट क्षेत्र नम्बर १ का क्षेत्रिय अध्यक्ष तथा समाजसेवी शुशिल खड्काले दुप्चेश्वर गाउँपालिका वडा नम्बर ५ मा रहेको एक सामाजिक संस्थालाई सहयोग गरेका छन् ।

बिहिबार आयोजित एक कार्यक्रममा खड्काले नेकपा एमाले वागमती प्रदेश सचिवालय सदस्य बलराम आचार्यको प्रमुख आतिथ्यतामा दुप्चेश्वर गाउँपालिका वडा नम्बर ५ मा रहेको सत्यवचन मार्ग दर्शन सामाजिक संस्था सुर्यडाँडालाई टेवल र कुर्सी लगायत आवश्यक सामग्री हस्तान्तरण गरेका हुन् ।

सहयोग हस्तान्तरण कार्यक्रममा बोल्दै खड्काले आगामी दिनमा पनि यस्ता सहयोग निरन्तरता दिने बताए । उनले आफुलाई दुःख र समस्यामा परेको बेला सम्झन आग्रह गर्दै सहयोग मागेमा आफु सधैँ तयार रहेको बताए ।

यस्तै कार्यक्रममा नेकपा एमाले वागमती प्रदेश सचिवालय सदस्य बलराम आचार्यले खड्काले लामो समयदेखि विभिन्न व्यक्तिहरुलाई सहयोग गरिरहेको भन्दै खुशी व्यक्त गरे ।

सहयोग हस्तान्तरण कार्यक्रममा नेकपा एमाले दुप्चेश्वर गाउँपालिका कमिटी अध्यक्ष एवं दुप्चेश्वर ५ का वडाध्यक्ष मईतबहादुर तमाङ, नेकपा एमाले दुप्चेश्वर गाउँपालिकाका उप–सचिव तथा निर्वाचित वडा सदस्य आर्यन तमाङ र दुप्चेश्वर गाउँपालिका वडा नम्बर ७ का वडा कमिटी अध्यक्ष दिपक पण्डित लगायतको उपस्थिति रहेको थियो ।