प्रदेशस्तरीय चुनावी समीक्षा गर्दै राप्रपा

नुवाकोट । राष्ट्रिय प्रजातन्त्र पार्टी (राप्रपा) ले प्रदेशस्तरीय चुनावी समीक्षा तथा संगठन पुनर्ताजगी कार्यक्रम सुरु गर्ने भएको छ।

पार्टी प्रवक्ता मोहन श्रेष्ठका अनुसार आज मधेश प्रदेशको बर्दिबासबाट कार्यक्रम सुरु गरिएको हो। बैठकमा हालै सम्पन्न निर्वाचनको समीक्षा र संगठन सुदृढीकरणबारे छलफल हुने उनले बताए।

कार्यक्रम अन्तर्गत वैशाख १० गते कोशी प्रदेश (इटहरी), १२ गते गण्डकी प्रदेश (आबुखैरेनी), १४ गते लुम्बिनी प्रदेश (भैरहवा), १५ गते बागमती प्रदेश (काठमाडौं) र १७ गते सुदूरपश्चिम प्रदेश (महेन्द्रनगर) मा बैठक तय गरिएको छ।

कर्णाली प्रदेशको बैठकको मिति भने पछि तय गरिने पार्टीले जनाएको छ। कार्यक्रममा पार्टी अध्यक्ष राजेन्द्र लिङ्देन, महामन्त्री तथा सचिवालय प्रमुख राजेन्द्र गुरुङलगायत नेताहरूको उपस्थिति रहनेछ।