रसुवामा आगो लागेको १२ वर्षपछि लगत संकलन कार्य सुरु

रसुवा । रसुवाको आमाछोदिङ्मो गाउँपालिका–३ गत्लाङको जंगलमा आगो लागेको १२ वर्षपछि लगत संकलन कार्य सुरु भएको छ ।

डिभिजन वन कार्यालय रसुवाले यही जेठ महिनाभित्रमा लगत लिने काम सम्पन्न गर्ने छ । यसका लागि वन कार्यालयका कर्मचारी, उपभोक्ता समितिका पदाधिकारी खटिएका छन् । यसअघि गरिएकोे प्रारम्भिक अध्ययन अनुसार करिब २५ प्रतिशत रुख प्रयोगमा ल्याउन सक्ने हैसियतका रहेको देखिएको कार्यालयका सूचना अधिकारी बद्रिप्रसाद ढुंगानाले बताए ।

बाँकी रुखहरूको हैसियत बिग्रिएर गुणस्तर खस्किसकेको छ । डढेलोले सखाप पारेको त्यस क्षेत्रमा २०७७ फागुनमा एक हजार एक सय ६३ वटा रुखको लगत लिने कार्य सम्पन्न भएको थियो । यसअघि काठको व्यवस्थापनको लागि विभिन्न चरणमा छलफल भएको भएपनि त्यसले कुनै निष्कर्ष दिन सकेको थिएन । लगत संकलन भएपछि विश्लेषणको काम हुने छ । ‘हामीले पहिलो चरणमा लगत संकलन गरेर विश्लेषण गर्छौं’, उनले भने, ‘त्यसपछि कसरी अघि बढ्ने बारे योजना निर्माण हुन्छ ।’

लगत संकलन गर्दा रुखको अवस्था, रुख हटाउनका लागि लाग्ने समय र लागत, रुखको व्यवस्थापन लगायतका विषय समावेश हुने छ । उनका अनुसार रुख व्यवस्थापन गर्नका लागि करिब १ वर्ष लाग्छ ।

दोस्रो चरणमा त्यहाँ भएका रुख हटाएर कार्यालयले वृक्षारोपण कार्य अघि बढाउनेछ  । ‘त्यस क्षेत्रमा पहिलोको जस्तै हरियाली बनाउनका लागि हामी कृतिम र प्राकृतिक पुनर्उत्पादनका प्रक्रियाहरू अघि बढाउँछौं’, उनले भने, ‘यसका लागि आगामी आर्थिक वर्ष २०७८/७९ को योजना तर्जुमा गर्ने क्रममा बागमती प्रदेशको उद्योग, पर्यटन, वन तथा वातावरण मन्त्रालय समक्ष कार्यक्रम र बजेट पठाउन प्रस्ताव गरिसकेका छौं ।’