अफगानिस्तानी राष्ट्रपति घानीले गरे शान्ति परिषद्‌को विघटन

काबुल ,अफगानिस्तानका राष्ट्रपति असरफ घानीले उच्चस्तरीय शान्ति परिषद्को सचिवालय विघटन गरिदिएका छन्।

तालिबान विद्रोहीसँग वार्ता गर्नका लागि सन् २०१० मा तत्कालीन राष्ट्रपति हमिद् कारजाईले बनाएको सो सचिवालयलाई घानीले शनिबार विघटन गरिदिएका हुन्।

अफगानी राष्ट्रपतिका प्रवक्ता सेदिक सेदिकीले परिषद्को काम नवगठित शान्ति मामिला मन्त्रालयले गर्ने भएकाले परिषद्को आवश्यकता नदेखिएको पत्रकारहरुलाई जानकारी दिए। सरकारी निकायका रुपमा परिषद्ले विद्रोही तालिवान तथा अरु आतङ्कवादी समूहरुलाई पुनर्मिलन र मेलमिलापका लागि पहल गर्दै आइरहेको थियो।

परिषद्मार्फत राष्ट्रिय र अन्तर्राष्ट्रिय तहमा वार्ता तथा छलफलहरु गर्नका लागि ७४ जनाले काम गरेका थिए। झण्डै २० वर्षदेखि द्वन्द्वमा फसेको अफगानिस्तानमा विभिन्न विद्रोही तथा आतङ्कवादी समूहहरु सक्रिय छन्। रासस/एएनआई