रसुवागढी भन्सार कार्यालयमा आइतबारदेखि ‘ब्रोकर मोडल’ सञ्चालन

नुवाकोट असार १,रसुवागढी भन्सार कार्यालयमा आइतबारदेखि ‘ब्रोकर मोडल’ सञ्चालनमा आउने भएको छ । भन्सारमा हुने कारोबारलाई पारदर्शी बनाउनका लागि आसिकुडा वर्ल्ड सिस्टमको ब्रोकर मोडल सञ्चालनमा ल्याउन लागिएको हो ।

ब्रोकर मोडलले भन्सार कार्यालयका कर्मचारी र व्यवसायी दुवैलाई जिम्मेवार बनाउने छ । यसले कार्यालयमा कामको चाप घट्नेछ । आयातकर्ता, प्रतिनिधि वा भन्सार एजेन्टले ब्रोकर मोडलबाट मालवस्तुको घोषणा गर्नेछन् । यो प्रणालीले भन्सार कर्मचारी र व्यावसायीबीचको दूरी पनि बढाउनेछ । यसका लागि व्यावसायी तथा एजेन्टले पासवर्ड पाउँछन् । त्यही सफ्टवेयर प्रयोग गरेर उनीहरूले जहाँबाट पनि सामग्रीको घोषणा गर्न सक्छन् । घोषणा गर्नुपूर्व उनीहरूले सामग्री अनुसार महसुल हेर्नुपर्छ ।

यसका लागि पहिलो एजेन्टको रूपमा सापकोटा प्रोभिजनल एण्ड फर्वाडिङका माधव प्रसाद सापकोटाले अनुमति पाउनु भएको छ । भन्सारमा हुने कारोबारलाई स्वच्छ र पारदर्शी बनाउनका लागि यो मोडल सञ्चालनमा ल्याउन लागिएको प्रमुख भन्सार अधिकृत पुण्य विक्रम खड्काले बताउनुभयो । ‘भारतसँग सीमा जोडिएका क्षेत्रका भन्सार कार्यालयमा यो मोडल पहिलेदेखिनै सञ्चालनमा थियो, उहाँले भन्नुभयो, यहाँ हामीले पहिलो पटक सञ्चालन गर्दै छौँ ।’ यसले व्यावसायी तथा भन्सार कर्मचारीलाई थप जिम्मेवार बनाउने छ ।

 

साभार उज्यालो