एसईईका लागि रसुवामा ६ केन्द्र तोकिए

रसुवा । रसुवाबाट यस वर्ष माध्यमिक शिक्षा परीक्षा (एसईई) मा ५ सय ५७ विद्यार्थी सहभागी हुने भएका छन् ।

आगामी चैत १९ गतेदेखि देशभर एकसाथ सुरु हुने परीक्षामा जिल्लाबाट कुल ५५७ परीक्षार्थी सहभागी हुने शिक्षा विकास तथा समन्वय इकाई रसुवाले जनाएको छ ।

इकाईका सूचना अधिकारी जीवन दाहालका अनुसार नियमिततर्फ ४७६ र ग्रेड वृद्धितर्फ ८१ जना परीक्षार्थी एसईईमा सहभागी हुनेछन् । यस वर्ष रसुवामा ६ वटा परीक्षा केन्द्र निर्धारण गरिएको छ । विद्यार्थीलाई सहज हुने गरी पायक पर्ने स्थानमा परीक्षा केन्द्र तोकिएको छ ।

निर्धारण गरिएका केन्द्रहरूमा रसुवा माध्यमिक विद्यालय, धुन्चे; स्यामेवाङफेल माध्यमिक विद्यालय, स्याफ्रुबेंसी; कालिका हिमालय माध्यमिक विद्यालय, कालिकास्थान; निलकण्ठ माध्यमिक विद्यालय, बोगटिटार; निलकण्ठ नमुना माध्यमिक विद्यालय, जिवजिवे र गौतम बुद्ध माध्यमिक विद्यालय, फाम्चेत रहेका छन् ।

प्राविधिक धारतर्फ अध्ययनरत विद्यार्थीका लागि निलकण्ठ माध्यमिक विद्यालय, बोगटिटार र गोसाइँकुण्ड माध्यमिक विद्यालय, सरस्युमा परीक्षा केन्द्र व्यवस्था गरिएको छ । यसअन्तर्गत नियमिततर्फ ५५ जना विद्यार्थी सहभागी हुनेछन्, जसमा बोगटिटारबाट १९ र सरस्युबाट ३६ जना रहेका छन् ।