नेपाल ट्वान्टी–२० विश्वकपको नजिक

नुवाकोट । नेपालले ट्वान्टी–२० विश्वकप एसिया–इस्ट एसिया प्यासिफिक छनोटको सुपर सिक्समा सोमबार कतारमाथि ५ रनको रोमाञ्चक विजय हात पारेको छ ।

अर्को एक पटक हारको नजिक पुगेर नतिजा उल्टाएको नेपाल यस विजयपछि ट्वान्टी–२० विश्वकपको नजिक पुगेको हो । सन्दीप लामिछानेले ५ विकेट लिएपछि ओमानको मस्कटमा भइरहेको प्रतियोगितामा १ सय ४८ रनको लक्ष्य लिएर मैदान उत्रिएको कतार १९.५ ओभरमा १ सय ४२ रनमा अलआउट भयो । सुपर लिगमा नेपालको यो लगातार दोस्रो विजय हो । नेपालले अघिल्लो दिन सुपर सिक्सको पहिलो खेलमा यूएईलाई १ रनले पराजित गरेको थियो ।

नेपाल र ओमानको समान ६ अंक छ । नेपाल र ओमान बुधबार खेल्दै छन् । यसले यी दुई टोलीको विश्वकपमा पुग्ने औपचारिकता निश्चित गर्नेछ । यूएई र जापानको २–२ अंक छ । नेपालले अन्तिम खेल सामोओसँग शुक्रबार खेल्नेछ ।

इमाल लियानागे र जुबेर अलीले पहिलो विकेटमा १० ओभरमा ७९ रन जोडी कतारलाई उत्कृष्ट सुरुआत दिलाएका थिए । १० औं ओभरको अन्तिम बलमा लियानागेलाई ५६ रनमा सन्दीप लामिछानेले बोल्ड गरी यो साझेदारी तोडेका थिए । लियानागेले ३५ बल खेली ५ चौका र ३ छक्का प्रहार गरे ।

सन्दीपले आफ्नो अर्को ओभरमा मोहम्मद असिमलाई १० रनमा आउट गरे । दीपेन्द्रसिंह ऐरीले कप्तान मिर्जा बेगलाई २ र आदिल आलम अन्सारीले मोहम्मद तान्भिरलाई शून्य रनमा सिधा थ्रोमा रनआउट गरेका थिए । आफ्नैअगाडि ७ विकेट झरेपछि १९ औं ओभरमा जुबेर आउट भएका थिए । नन्दनको बलमा आउट हुनुपूर्व उनले ५५ बल खेली २ चौका र १ छक्का प्रहार गरी ५२ रन बनाए ।

सन्दीपले अन्तिम दुई ब्याट्सम्यान मुजीब उर रहमान र अमिर फारुखलाई स्टम्प आउट गराए । सन्दीपले ३.५ ओभरमा १८ रन खर्चेर ५ विकेट लिए । ट्वान्टी–२० अन्तर्राष्ट्रियको एकै खेलमा ५ विकेट लिएको यो दोस्रो पटक हो । नन्दन यादवले २ र दीपेन्द्रसिंह ऐरीले १ विकेट लिए ।

यसअघि टस हारेपछि ब्याटिङको निम्तो पाएको नेपालले निर्धारित २० ओभरमा ९ विकेट गुमाई १ सय ४७ रन बनाएको थियो ।

कुशल भूर्तेल ६, आसिफ शेख ११ र कुशल मल्ल ८ रनमा आउट भएपछि कप्तान रोहित पौडेल र दीपेन्द्रसिंह ऐरीले चौथो विकेटमा ४४ बलमा ६२ रन जोडी नेपाललाई राम्रो स्कोरमा पुर्‍याएका थिए । तर, त्यसपछि नेपालले ६ रनको अन्तरमा ४ विकेट गुमाएपछि आफ्नो स्कोरलाई १ सय ४७ रनभन्दा माथि लान सकेन ।

१५ औं ओभरको अन्तिम बलमा दीपेन्द्र आउट भएपछि नेपालको विकेट झर्ने क्रम सुरु भएको थियो । दीपेन्द्रले २२ बल खेली १ चौकासहित २६ रन बनाए । यस विश्वकप छनोटमा पहिलो पटक मौका पाएका आदिल आलम अन्सारी ६ बलमा २ रनमात्र बनाई आउट भए ।

कप्तान रोहित पौडेलले ५८ रनको इनिङ्स खेले । ट्वान्टी–२० अन्तर्राष्ट्रियमा रोहितको यो आठौं अर्धशतक हो । रोहितले ४१ बल खेली ७ चौका र १ छक्का प्रहार गरे । सन्दीप जोरा १ रनमै आउट भए । गुलशन झाले ८ बल खेली २ छक्का प्रहार गरी १६ र इनिङ्सको अन्तिम बलमा २ रन लिने प्रयासमा रनआउट भएका सोमपाल कामीले ९ बल खेली १ छक्कासहित १४ रन बनाए । नन्दन यादव २ बल खेली १ रनमा अविजित रहे ।

कतारका कप्तान मिर्जा बेग र डानियल आर्चरले ३–३ विकेट लिए । बेगले ४ ओभरमा २९ र आर्चरले ३ ओभरमा २२ रन खर्चेका थिए ।