बागमती प्रदेशको सभामुखमा कांग्रेसको दाबी

विदुर खबर २०८२ असोज २४ गते २१:३६

नुवाकोट । बागमती प्रदेशको रिक्त सभामुख पदमा नेपाली कांग्रेसले दाबी गर्ने भएको छ ।

शुक्रबार दिउँसो हेटौंडामा दलका नेता एवम् मुख्यमन्त्री इन्द्रबहादुर बानियाँको अध्यक्षतामा बसेको बैठकले रिक्त प्रदेश सभाको सभामुखमा नेपाली काँग्रेसले दाबी गर्ने निर्णय गरेको हो ।

राप्रपाबाट सभामुख रहेका भुवन कुमार पाठकले गत भदौ २३ र २४ गते भएको जेन–जी आन्दोलन र त्यसपछिको प्रदर्शनका क्रममा राजीनामा दिएका थिए ।

उनीसँगै राप्रपाका अन्य सांसदहरुले पनि सामाजिक सञ्जालमार्फत राजीनामा घोषणा गरे पनि आधिकारिक रूपमा प्रदेश सभामा राजीनामा नदिएको बताउँदै आएका छन् ।

बैठकले प्रदेशमा देखिएका विपद् व्यवस्थापनका चुनौतीबारे चर्चा गर्दै स्थानीय सरकारसँग समन्वय गरी तीव्र गतिमा राहत तथा पुनःस्थापना कार्य अगाडि बढाउने निर्णय गरेको छ ।