इजरायल र हमासबीच युद्धविराम गर्ने सहमति

एजेन्सी । अमेरिकी राष्ट्रपति डोनाल्ड ट्रम्पले इजरायल र हमासले शान्ति योजनाको पहिलो चरणमा हस्ताक्षर गरेको बताएका छन्। बन्धकहरु सोमबारदेखि रिहाइ गर्ने तयारी गरेको छ ।

“यसको अर्थ अब सबै बन्दीहरू चाँडै मुक्त हुनेछन् । इजरायलले आफ्नो सेना सहमतिको रेखासम्म फिर्ता गर्नेछ,” ट्रम्पले बिहीबार बिहान आफ्नो ‘ट्रुथ सोसल’ मा लेखेका छन् । इजरायल र हमासबीच सोमबारदेखि इजिप्टमा वार्ता भइरहेको थियो ।

बुधबारको वार्तामा अमेरिकी बिशेष दुत र कतारी प्रधानमन्त्री सहितको सहभागिता थियो । अमेरिका, इजिप्ट र कतारका मध्यस्थतामा इजिप्टको शर्म एल–शेखमा भएको वार्तामा गाजामा युद्धविराम गर्ने सहमति भएको हो । वार्ता सफल भए लगत्तै ट्रम्प आउँदो केही दिनभित्र मध्यपूर्व यात्रा गर्ने तयारीमा छन् ।

इजरायल सरकारको मन्त्रिपरिषद्ले पहिलो चरणको योजनालाई बिहीबार पारित गरे लगत्तै युद्धविराम हुनेछ । इजरायली प्रधानमन्त्री वेञ्जामिन नेतान्याहुले इजरायलको लागि महत्वपूर्ण दिन भएको बताए । उनले चाँडै बन्धकहरू घर फर्किने अपेक्षा समेत गरे।

एक वरिष्ठ प्यालेस्टिनी अधिकारीले बीबीसीलाई बताएअनुसार इजरायली सरकारले स्थानीय समय करिब दिउँसो २ : ०० बजे युद्धविराम गर्न स्वीकृति जनाउनेछ ।

त्यसपछि पहिलो पाँच दिनका लागि इजरायलले दैनिक ४०० राहत ट्रक गाजामा प्रवेश गर्न अनुमति दिनेछ । यो संख्या पछि चरणगत रूपमा बढाइनेछ ।