बागमतीमा ‘नो हेल्मेट, नो फ्यूल’ अभियान कार्यान्वयन हुने

नुवाकोट । बागमती प्रदेशमा अब दुईपाङ्ग्रे सवारी साधनमा हेल्मेट नलगाई पेट्रोल पम्पबाट इन्धन पाउन नपाइने भएको छ ।

बुधबार मुख्यमन्त्री तथा मन्त्रिपरिषद्को कार्यालयमा आयोजित छलफल कार्यक्रममा मुख्यमन्त्री इन्द्रबहादुर बानियाँले ‘नो हेल्मेट, नो फ्यूल’ अभियान तत्काल कार्यान्वयन गर्न सम्बन्धित निकायलाई निर्देशन दिए ।

अभियानको प्रभावकारी कार्यान्वयनका लागि जिल्ला प्रशासन र सुरक्षा निकायमार्फत निगरानी गरिनेछ । यससँगै नेपाल आयल निगम र नेपाल पेट्रोलियम डिलर्स राष्ट्रिय एसोसिएसन बागमती प्रदेशले पेट्रोल पम्पमा ‘हेल्मेट अनिवार्य’ भन्ने सन्देशमूलक बोर्ड राख्ने व्यवस्था मिलाउन पत्राचार गर्ने निर्णय भएको छ ।

मुख्यमन्त्री बानियाँले बढ्दो सवारी दुर्घटना नियन्त्रणका लागि सवारी चालकको मादक पदार्थ तथा लागू पदार्थ सेवन परीक्षणलाई नियमित र प्रभावकारी बनाउन पनि सम्बन्धित निकायलाई निर्देशन दिए ।

बैठकमा नेपाल प्रहरी, राजमार्ग सुरक्षा तथा ट्राफिक व्यवस्थापन कार्यालय चितवनका तर्फबाट प्रदेशभित्र दिनानुदिन बढ्दो दुर्घटनाको अवस्था र कारणबारे प्रस्तुतीकरण राखिएको थियो ।