देशभरि बदली र वर्षा, केही ठाउँमा भारी वर्षाको सम्भावना

नुवाकोट । हाल मनसुनको न्यूनचापीय रेखा सरदर स्थानमा सक्रिय रहेकाले देशभरि आंशिकदेखि साधारणतया बदलीको अवस्था छ।

जल तथा मौसम पूर्वानुमान महाशाखाका अनुसार बंगालको खाडीबाट मनसुनी हावाको प्रभाव केही बढेको छ। कोशी र लुम्बिनी प्रदेशका केही स्थानहरूमा भारी वर्षा भएको छ भने दिउँसो देशभरि नै बदली रहनेछ।

सातै प्रदेशका पहाडी भूभागहरूमा हल्कादेखि मध्यम वर्षाको सम्भावना रहेको मौसमविद गोविन्द झाले बताएका छन्।

कोशी, गण्डकी र सुदूरपश्चिमका केही स्थानमा भारी वर्षाको सम्भावना छ। राति पनि देशभरि बदली रहनेछ भने कोशी र सुदूरपश्चिमका एक–दुई स्थानमा भारी वर्षा हुनसक्ने सम्भावना छ। भोलिदेखि भने मौसममा सुधार आउने अनुमान गरिएको छ।