देशभर मनसुन सक्रिय, भारी वर्षा र पहिरोको जोखिम

नुवाकोट । हाल देशभर मनसुनी वायुको प्रभाव सक्रिय रहेको छ।

मनसुनको न्यून चापीय रेखा पश्चिम र मध्य नेपालमा सरदर स्थानभन्दा उत्तरतिर छ भने पूर्वमा सरदर स्थानको आसपासमा रहेको मौसम पूर्वानुमान महाशाखाले जनाएको छ। कोशी, बागमती, गण्डकी र कर्णाली प्रदेशमा आंशिकदेखि सामान्य बदली रही हल्कादेखि मध्यम वर्षा भइरहेको छ।

आज दिउँसो र राति देशभर सामान्य बदली रहनेछ। विशेषगरी पहाडी तथा हिमाली भूभागका धेरै स्थानमा चट्याङसहित हल्कादेखि मध्यम वर्षा र केही स्थानमा भारीदेखि अति भारी वर्षाको सम्भावना छ। उच्च पहाडी तथा हिमाली क्षेत्रमा हिमपात हुन सक्ने पूर्वानुमान गरिएको छ।

महाशाखाले कोशी, बागमती र गण्डकी प्रदेशका पहाडी भूभागमा सम्भावित भारी वर्षाका कारण बाढी, पहिरो र भूक्षयको जोखिम रहेकाले आवश्यक सतर्कता अपनाउन आग्रह गरेको छ।