यू-१९ महिला विश्वकप छनोट: नेपालले आज कुवेतसँग खेल्दै

नुवाकोट । नेपालले युएईमा जारी आईसीसी यू-१९ महिला टी-२० विश्वकप एसिया छनोट अन्तर्गत आज कुवेतविरुद्ध खेल्दै छ ।

दुबईस्थित द सेभेन स्टेडियममा हुने यो खेल बिहान ११: १५ बजेदेखि सुरु हुँदै छ। प्रतियोगितामा नेपालले ४ खेलमा ३ जित र एक हार बेहोरेको छ। अङ्क तालिकामा नेपाल ४ खेलमा ६ अङ्कसहित दोस्रो स्थानमा रहेको छ।

नेपालले यसअघि कुवेतलाई १०८ रनले पराजित गरेको थियो। त्यस्तै कुवेतले अहिलेसम्मका चारै खेलमा हार बेहोरेको छ। नेपालले यस प्रतियोगितामा बिहीबार युएईसँग खेल्ने तालिका रहेको छ।

छनोट प्रतियोगिता नेपाल र कुवेतसँगै आयोजक युएई र थाइल्याण्ड सहभागी छन् । डबल राउण्ड रोविनका आधारमा खेलाइएको यस प्रतियोगितामा शीर्ष स्थानमा रहने टोली अर्को वर्ष मलेसियामा हुने यू-१९ महिला टी-२० विश्वकपमा छनोट हुनेछ।