त्रिशुलीमा टिमुरे यातायातले निर्माण गरेको विद्युतीय चार्जिङ स्टेसनको उद्घाटन

नुवाकोट । नुवाकोटको विदुर नगरपालिका वडा नम्बर १ को त्रिशुली वसपार्कमा निर्माण गरिएको विद्युतीय चार्जिङ स्टेसनको शनिवार उद्घाटन गरिएको छ ।

टिमुरे यातायात प्रालिले निर्माण गरेको सो विद्युतीय चार्जिङ स्टेसनको विदुर नगरपालिकाका मेयर राजन श्रेष्ठ र विदुर १ वडाध्यक्ष लेनिन रन्जितले संयुत्त रुपमा उद्घाटन गरेका हुन् । झण्डै ३० लाख रुपैयाँको लागतमा निर्माण भएको सो चार्जिङ स्टेसनको टिमुरे यातायात प्रालिले काठमाण्डौ–त्रिशुली रुटमा संचालन गरेको ई–माईक्रोको लागि निर्माण गरेको हो ।

चार्जिङ स्टेसनको उद्घाटन गर्दै विदुर नगरपालिकाका मेयर राजन श्रेष्ठले चार्जिङ स्टेशन सञ्चालनमा आएपछि विद्युतीय सवारीसाधन खरिद गरी चलाउने व्यवसायीलाई विदुर नगरपालिकाले प्रोत्साहन गर्नेे बताए । उनले त्रिशुली वसपार्कमा चार्जिङ स्टेसन निर्माण भएकोले वसपार्क क्षेत्रमा चहलपहल हुने समेत विश्वास व्यक्त गरे ।

त्यस्तै कार्यक्रममा विदुर नगरपालिका वडा नम्बर १ का वडाध्यक्ष लेनिन रन्जितले नेपाल विद्युत प्राधिकरण र सबै पक्षको सहयोगले त्रिशुलीमा छोटो समयमै चार्जिङ स्टेसन निर्माण गर्न सकिएकोे बताए । उनले चार्जिङ स्टेसनबाट आएको मुनाफाको ३० प्रतिशत रकम वडा कार्यालय र नगरपालिकामा जम्मा हुने बताए ।

यस्तै कार्यक्रममा नुवाकोट उद्योग वाणिज्य संघका अध्यक्ष राजेन्द्र श्रेष्ठले व्यवसायीहरुलाई समस्या देखिए आफु सहयोग र समन्वय गर्न तयार रहेको बताए । उनले देशभर विद्युतीय सवारीहरुको संख्या बढेपनि चार्जिङ स्टेसनहरु बन्न नसकेको बताए ।
त्यस्तै कार्यक्रममा टिमुरे यातायात प्रालिका अध्यक्ष प्रकाश जोशीले आन्तरिक रूपमा विद्युतको खपत बढाउन, पेट्रोलियम पदार्थको खपत कम गरी आयात घटाउन र विद्युतीय सवारी साधन प्रयोगमार्फत वातावरणमैत्री यातायात प्रणालीको विकासका लागि चार्जिङ स्टेसन निर्माण गरिएको बताए ।

नुवाकोटमै पहिलो पटक आफुहरुले निजि क्षेत्रबाट चार्जिङ स्टेसन निर्माण गरेको उनले जानकारी दिए । चार्जिङ स्टेसनमा सबै किसिमका आम उपभोत्ताले गाडी चार्ज गर्न पाउने उनले बताए । चार्ज गरेवापत प्रति युनिट सात रुपैयाँ महसुल तिर्नपर्ने बताईएको छ ।

कार्यक्रममा जिल्ला ट्राफिक कार्यालय नुवाकोटका प्रमुख राजकुमार तिवारीले विद्युतिय सवारीमा हुने सक्ने जोखिमवारे चालक र सह–चालकलाई जानकारी गराएका थिए ।

त्यस्तै त्रिभुवन बहुमुखी क्याम्पसका अध्यक्ष नारायण श्रेष्ठ र प्रेस युनियनका केन्द्रिय सदस्य किरण अधिकारीले यातायात व्यवसायीहरुको पनि केही व्यहारिक समस्या बुझिदिन सरोकारवाला निकायहरुको ध्यानाकर्षण गराएका थिए ।

नेपालले वर्षेनी पेट्रोल आयातमा खर्बौ रुपैयाँ व्यापार घाटा व्यहोरिरहेको छ । नेपालको नदिमा प्रशस्त पानी भएको कारण नेपालमा विद्युत बढी उत्पादन हुने र नेपालले विद्युतिय गाडी प्रयोगमा ल्याउन सके जलविद्युतले बजार पनि प्रश्स्तै पाउने हुँदा देशको अर्थतन्त्रमा ठुलो टेवा दिने विश्वास गरिएको छ ।

विद्युतिय चार्जिङ स्टेसन उद्घाटन कार्यक्रममा नविल बैंक बट्टारका शाखा प्रमुख श्रीराम नेपाल, कुमारी बैंक बट्टार शाखा प्रमुख उद्धव कडेल, प्राइम बैंक बट्टार शाखा प्रमुख राजु ढकाल लगायतको उपस्थिति रहेको थियो ।