अनलाइनमार्फत यौन व्‍यवसाय गरेको आरोपमा नुवाकोटका एकजना पक्राउ

नुवाकोट । अनलाइनमार्फत यौन व्‍यवसाय सञ्‍चालन गरेको आरोपमा प्रहरीले नुवाकोटको विदुर नगरपालिका वडा नम्बर ६ का एक जनासहित ५ जनालाई पक्राउ गरेको छ ।

पक्राउ पर्नेमा विदुर नगरपालिका वडा नम्बर ६ घर भई भई हाल काठमाडौं महानगर–१६ बस्‍ने अमृत रोक्का रहेका छन् ।

काठमाडौं उपत्यका अपराध अनुसन्धान कार्यालयको टोलीले काठमाडौंको बानेश्वरबाट अनलाइनमार्फत यौन व्यवसाय सञ्चालनमा संलग्नताको आरोपमा रोक्का सहित ५ जनालाई पक्राउ गरेको हो ।

पक्राउ पर्ने अन्यमा रामेछापको दोरम्बा–३ घर भई हाल ललितपुर बस्‍ने २७ वर्षीय छत्रबहादुर रोक्का, ओखलढुङ्गाको लिखु गाउँपालिका–७ घर भई हाल कागेश्वरी मनोहरा बस्‍ने ३३ वर्षीय गोपाल थापा, सिन्धुलीको सुनकोशी गाउँपालिका–६ घर भई हाल काठमाडौंको कालोपुल बस्‍ने ४४ वर्षीय सेते सार्की, सल्यानको कपुरकोट–५ घर भई हाल काठमाठौंको बालाजु–१६ बस्‍ने २५ वर्षीय शिवराज परियार रहेका छन् ।

पक्राउ परेका उनीहरूलाई कारबाहीका लागि जिल्ला प्रहरी परिसर टेकु पठाइएको अपराध अनुसन्धान कार्यालयका प्रहरी उपरीक्षक (एसपी) एवं प्रवक्ता रवीन्द्र रेग्मीले बताए ।