आज हरिबोधनी एकादशी, वेत्रावति र देविघाटमा भक्तजनको घुइँचो

नुवाकोट । आज हरिबोधनी एकादशी पर्व मनाइँदै छ ।

हरिबोधिनी एकादशीलाई एक वर्षभरमा पर्ने चौबीस वटा एकादशीहरुमध्ये सबैभन्दा महत्वपूर्ण एकादशीको रुपमा लिइन्छ । त्यसैले सामान्य बोलीचालीको भाषामा यसलाई ठूलो एकादशी पनि भनिन्छ ।

चार महिनाअघि अर्थात् आषाढ शुक्ल एकादशीको दिनमा आ-आफ्नो घरमा रोपिएको तुलसीलाई आजको दिन मठ सिंगारेर विशेष पूजा गरी विष्णु भगवानका अर्का रुप पीपलसँग विवाह गरिदिने परम्परा रहिआएको छ । आजको दिन सखरखण्ड, पिंडालु आदि कन्दमूल र फलफूल प्रसादको रुपमा खाने गरिन्छ ।

हरिबोधनी एकादशीको दिन नुवाकोटको वेत्रावति, देविघाट लगायतको स्थानमा बिहानैदेखि भक्तजनको घुइँचो लागेको छ ।हरिबोधनी एकादशीको अवसरमा नुवाकोटको किस्पाङ गाउँपालिकाले आज सार्वजनिक बिदा दिएका छन् ।