नुवाकोटको पन्चकन्यामा एक बृद्धाको खुकुरी प्रहार गरि हत्या

नुवाकोट । नुवाकोटको पञ्चकन्या गाउँपालिका वडा नम्बर ३ तीनघरेमा एक बृद्धा महिलाको हत्या भएको छ ।

हत्याको आरोपमा प्रहरीले एक जनालाई पक्राउ गरेको छ । मंगलबार स्थानीय ७१ वर्षीया नुरकुमारी थापाको हत्या गरेको आरोपमा सोही वडाका २७ वर्षीय श्यामबहादुर तामाङलाई पक्राउ गरिएको जिल्ला प्रहरी कार्यालय नुवाकोटका प्रमुख तथा एसपी सञ्जयसिंह थापाले बताए ।  दसैं मान्न पैसा माग्दा नदिएपछि श्यामबहादुरले नुरकुमारीको हत्या गरेको प्रहरीको अनुसन्धानबाट खुल्न आएको छ।

नुरकुमारीले पैसा नदिएपछि श्यामबहादुरले खुकुरीले टाउकोमा हानेको बयानमा बताएको प्रहरीले जनाएको छ । श्याम बहादुरलाई प्रहरीले शुक्रबार अदालतबाट १५ दिनको म्याद थप गरेर अनुसन्धान प्रक्रिया अगाडि बढाएको छ ।

प्रहरीले नुरकुमारीको शवको पोस्टमार्टम गरी आफन्तलाई बुझाइसकेको छ ।