तुलसीपुरमा मेयर कप खेलकुद २३ गतेबाट

१२ फागुन, तुलसीपुर । तुलसीपुर उपमहानगरपालिकाले मेयर कप खेलकुद प्रतियोगिता सुरु गर्ने भएको छ ।

नीति तथा कार्यक्रम अनुसार खेलाडीहरुलाई उत्प्रेरित गर्नका लागि आयोजना गर्न लागिएको कपको पहिलो खेलको सुरुआत हुने भएको छ ।

पहिलो मेयरकप खेल अन्तर्गत फागनु २३ , २४ र २५ गतेसम्म तुलसीपुर उपमहानगरपालिका वडा नम्वर १२ को ववइ नदीमा विच भलिबल प्रतियोगिताको आयोजना गरिएको संयोजक अमर नेपाली माइकलले बताए ।

उनका अनुसार ५ नम्वर प्रदेशमै पहिलो पटक विच भलिबल खेलको आयोजना गरिएको हो । उनले पर्यटन प्रवर्द्धन गर्नका लागि यस खालको प्रतियोगिता आयोजना गरिएको पनि बताए ।

खेलकुद प्रतियोगितामा १९ वटै वडाका खेलाडीहरुले भाग लिन पाउनेछन् ।

विच भलिबलका लागि हरेक समूहमा दुई दुई जना खेलाडी रहने छन् । खेलमा सहभागी हुने खेलाडीलाई अनिवार्य रुपमा वडाले सिफारिस गर्नुपर्ने छ ।

शुक्रवार वसेको वैठकले संयोजक अमर नेपाली माइकलको अध्यक्षतामा सहभागिताका लागि सबै खेलाडीहरुलाई आव्हान गर्ने समेत निर्णय गरेको छ ।

बैठकमा सदस्यहरु कुमार लामिछाने, राजु आचार्य, दिपक कुमाल, जानका रेग्मी र सदस्य सचिव झरेन्द्र खरेलको उपस्थिति रहेको थियो ।

खेलका महिला र पुरुष तर्फ पहिलो, दोस्रो र तेस्रो हुनेलाई अलग अलग रुपमा क्रमशः २५ हजार, १५ हजार र १० हजार पुरस्कारको व्यवस्था गरिएको उपमहानगरपालिकाका प्रेस संयोजक बसन्त विवश आचार्यले जानकारी दिएका छन् ।