नुवाकोटको बेलकोटगढीमा ग्यास पड्किएर आगलागी

विदुर खबर २०७९ फागुन १६ गते ७:२७

नुवाकोट । बेलकोटगढी नगरपालिका ८ पाँचखलेस्थित विश्वनाथ पुडासैनीको घरमा ग्यासको सिलिण्डर पड्किएर आगलागी हुँदा साढे तीन लाख रुपैयाँ बराबरको क्षति पुगेको छ ।

आगलागीमा परी अन्नपात, भाँडाकुँडा, लत्ताकपडा जलेको तर कुनै मानवीय क्षति नभएको जिल्ला प्रहरी कार्यालयका सूचना अधिकारी एवं डीएसपी खगेन्द्र खड्काले बताए ।

जिल्ला विपद् व्यवस्थापन समितिका अध्यक्ष किरण थापाले आगलागी पीडितलाई स्थानीय प्रशासन र नेपाल रेडक्रस सोसाइटीको संयुक्त रुपमा आवश्यकीय सहयोग र सामग्री प्रदान गरेका थिए ।

ढुंगा, माटोले बनेको र जस्ताले छाएको घर आगलागीमा परेर घर पूर्णरुपमा जलेको छ । बिदुर नगरपालिकाको दमकल र स्थानीयको सहयोगमा आगो नियन्त्रणमा ल्याइएको थियो ।