समस्याको पोको खोल्न विदुरका मेयर राजन श्रेष्ठ हेटौडामा

नुवाकोट । नुवाकोटको विदुर नगरपालिकाका मेयर राजन श्रेष्ठ समस्याको पोको लिएर हेटौडा गएका छन् ।

बाग्मति प्रदेशको राजधानी समेत रहेको हेटौडामा समस्याको पोको लिएर गएका मेयर श्रेष्ठले राखेका समस्याहरुलाई बागमती प्रदेश सरकारले समाधान गर्न चासो समेत देखाएको छ ।

समस्याको पोको लिएर मंगलबार प्रदेशको राजधानी हेटौँडा पुगेका श्रेष्ठलाई बाग्मति प्रदेशका मुख्यमन्त्री राजेन्द्र पाण्डे, आर्थिक मामिला तथा योजनामन्त्री शालिकराम जमरकट्टेल र भौतिक पुर्वाधार विकासमन्त्री कृष्णलाल भडेल समस्याको समाधानको लागि प्रतिवद्धता जनाएका छन् ।

भेटघाटको क्रममा मन्त्रिहरुलाई मेयर श्रेष्ठले विदुर नगरभित्रको विविध समस्याहरुको वारेमा अवगत गराएका थिए ।

मेयर श्रेष्ठले गल्छी–रसुवागढी सडक अन्तर्गत पिपलटार ढुँगे सडक खण्ड, देविघाट र नुवाकोट दरबार क्षेत्रको गुरुयोजना कार्यान्वयन, पर्यटन प्रबद्र्धनात्मक कार्यक्रम, अटो भिलेज निर्माण, वातावरणीय सुधार, बाढीपीडितहरुलाइ क्षतिपूर्ति र राहत लगायत समस्या समाधानका विषयमा मुख्यमन्त्री समक्ष मागपत्र हस्तान्तरण गरेका छन् ।

सो क्रममा मुख्यमन्त्री पाण्डेले ति समस्याहरु समाधान गर्ने प्रतिबद्धता व्यक्त गरेको मेयर श्रेष्ठले बताए ।

भेटमा मुख्यमन्त्री पाण्डेले गल्छी रसुवागढी सडक अन्तर्गत पिपलटार ढुँगे सडक खण्डको मुवाब्जा वितरण र सडक निर्माणमा देखिएको समस्या समाधानमा गम्भीरतापूर्वक लाग्ने प्रतिबद्धता जनाएका छन । साथै देविघाटको संस्कृत माविलाई आवासीय रुपमा संचालन गर्ने प्रदेश सरकारको योजना रहेको बताए ।

यस्तै देविघाट र नुवाकोट दरबार क्षेत्रको गुरुयोजना कार्यान्वयन र घुमफिर वर्ष अन्तर्गत दुवै क्षेत्रलाई समावेश गर्न सम्बन्धित निकायलाइ निर्देशन दिनुका साथै विदुरको सिल्टयान्कमा जलबिहारको लागि प्रदेश सरकारले सहयोग गर्ने मुख्यमन्त्री पाण्डेले प्रतिबद्धता व्यक्त गरेको मेयर श्रेष्ठले बताए ।