बेलकोटगढीको पन्चासे माविमा निशुल्क आँखा शिविर सम्पन्न

नुवाकोट । नुवाकोटको बेलकोटगढी नगरपालिका वडा नम्बर ४ मा रहेको पन्चासे माध्यामिक विद्यालयमा निशुल्क आँखा परिक्षण शिविर सम्पन्न भएको छ ।

स्थानिय बालक सरगम तामाङको एक जन्मदिनको अवसर पारेर दृष्टि आँखा केन्द्र बट्टारको प्राविधिक सहयोगमा आँखा परिक्षण कार्यक्रम आयोजना गरिएको हो ।

आँखा परिक्षण शिविरको बेलकोगढी नगरपालिकाका मेयर जगत गुरुङले उद्घाटन गरेका हुन् । कार्यक्रमको उद्घाटन गर्दै मेयर गुरुङले नगरपालिका भित्र रहेका बृद्धवृद्धाको आँखा परिक्षण गर्न यस्ता किसिमको शिविरले महत्वपुर्ण भुमिका खेल्ने बताए ।

शिविरमा २ सय विद्यार्थी र एकसय ६० जना सर्वसाधारणको निशुलक आँखा जाँच गरिएको दृष्टि आँखा केन्द्र बट्टारका डा.राजेश कुमार चौरासियाले जानकारी दिए । आँखा परिक्षण गरिएकामध्ये केहीमा सामान्य र केहीमा गम्भीर किसिमको समस्या देखिएको उनले बताए ।

आँखा परिक्षण गर्दा सामान्य समस्या देखिएकाहरुलाई निशुल्क औषधी समेत वितरण गरिएको थियो ।

दृष्टि आँखा केन्द्र बट्टारले नुवाकोटको विभिन्न स्थानमा पुगेर आँखा परिक्षण तथा निशुल्क चस्मा वितरण गरिरहेको छ ।