नेपालमा कोरोनाका कारण एकैदिन पाँच जनाको मृत्यु

नुवाकोट । कोरोनाका कारण एकैदिन पाँच जनाको मृत्यु भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ८१५ जनामा कोरोना संक्रमण पुष्टि हुँदा पाँच जनाको ज्यान गएको छ ।

बिहीबार थपिएकाे संख्या ७ महिना यताकै उच्च हाे । यसअघि माघ १५ गते,  ६ जना काेराेना संक्रमितकाे निधन भएकाे थियाे ।एक दिनमा देशभरमा कुल चार हजार ५३४ कोरोना परीक्षण भएको छ । २ हजार ४११ पीसीआर परीक्षणमध्ये ४६५ जनामा र २ हजार १२३ एन्टिजेन परीक्षणमध्ये ३५० जनामा कोभिड १९ संक्रमण पाइएको हो ।

आज थपिएका संक्रमित मध्ये काठमाडौंका १८३ जना, ललितपुरका ५९ जना र भक्तपुरका सात जना रहेका छन् । यसरी बिहीबार काठमाडौं उपत्यकामा संक्रमण पुष्टि हुनेको संख्या २४९ रहेका छन् ।

बिहीबार ४७६ जनाले भने कोरोना संक्रमण जितेका छन् । हाल नेपालमा सक्रिय संक्रमितको कुल संख्या पाँच हजार ८६९ रहेको छ ।