एसईइमा नुवाकोटको पृथ्वी र सुभेनियरका विद्यार्थी अब्बल

नुवाकोट । २०७८ सालमा सम्पन्न भएको माध्यामिक शिक्षा परिक्षा अर्थात एसईइको नतिजा अनुसार नुवाकोटको पृथ्वी मावि र सुभेनियर बोर्डिङ स्कुलका विद्यार्थी अब्बल देखिएका छन् ।

कोरोनाको कारण लगातार दुई वर्ष विद्यालयको आन्तरिक मुल्याङ्कनका आधारमा परिणाम सार्वजनिक गरिएकोमा यो पटक भने विद्यार्थीको उपस्थितिमा परिक्षा संचालन गरिएको थियो ।

यो पटकको एसईइमा जिल्लामा धेरै जिपिए ल्याउने विद्यार्थीमध्ये विदुरको पृथ्वी माविका तीन विद्यार्थी छन् भने बट्टारको सुभेनियर बोर्डिङ स्कुलका एक जना रहेका छन् ।

विगतका वर्षहरुको तुलनामा नुवाकोटका विद्यालयहरुले नजिता कमजोर देखिएको छ । नुवाकोटमा यो वर्ष ३.८५ प्रतिशत जिपिए प्राप्त गरि पृथ्वी माविका आशिम डिमडुङ तामाङ, अमिशा तामाङ र अस्मिता तामाङ रहेका छन् भने सुभेनियरका योजना धमला रहेको शिक्षा विकास तथा समन्वय इकाइ नुवाकोटले जनाएको छ ।

यस्तै ३.८० जिपिए दुई छात्राले ल्याएका छन् । पृथ्वी माविकी स्वेता कोइराला र सेइ बोर्डिङ स्कुलकी सदिक्षा सिटौटाले ३.८० जिपिए ल्याउन सफल भएका हुन् ।

२०७८ सालको एसईइमा नुवाकोटमा संस्थागत, सामुदायिक र प्राविधिक गरि एकसय ४३ विद्यालयका ४ हजार २ सय २२ जना सहभागि भएका थिए ।

परिक्षामा सहभागी भएकाहरुमध्ये ३.६ जिपिएदेखि ४ जिपिएसम्म ३५ जनाले ल्याएका छन् ।

त्यस्तै ३.२ जिपिएदेखि ३.६ सम्म एकसय ३३ जना, २.८ देखि ३.२ सम्म ३ सय २९ जना र २.४ देखि २.८ सम्म ६ सय ३३ जनाले ल्याएका छन् ।

यसैविच पृथ्वी माविले आईतवार विद्यालयमा एक कार्यक्रमको आयोजना गरि एसईइमा उत्कृष्ट नजिता हात पारेका विद्यार्थीहरुलाई सम्मान गरेको छ ।

नगरपालिकाका मेयर राजन श्रेष्ठ र उपमेयर प्रभा बोगटीलाई अतिथि बनाएर विद्यालयले जिल्लाकै उत्कृष्ट नतिजा ल्याउने विद्यार्थीलाई सम्मान गरेको हो ।