एसईईको नतिजा सार्वजनिक

नुवाकोट । एसईईको नतिजा सार्वजनिक भएको छ । राष्ट्रिय परीक्षा बोर्डले बुधबार कक्षा १० को माध्यमिक शिक्षा (एसईई) परीक्षाको नतिजा निकालेको हो ।

बुधबार बसेको बोर्डको बैठकद्वारा सार्वजनिक गरेको नतिजामा ४ लाख ९५ हजार ७५१ जना सहभागी भएका थिए । नतिजा अनुसार ९ हजार ६३३ जनाले ३.६ देखि ४ जीपीएसम्म ल्याएका छन् ।

एसईई परिक्षा दिएकामध्ये ४१ हजार ६२७ जना विद्यार्थीहरुले ३.२० देखि ३.६०, ६९ हजार ९०० विद्यालर्थीहरुले २.८० देखि ३.२० जीपीए र ९० हजार ७५८ जना विद्यार्थीहरुले २.४ देखि २.८० जीपीए ल्याएका छन् ।

यसैगरी, २ देखि २.४ जीपीए ल्याउने एक लाख १२ हजार ७३३ जना छन् । १.६ देखि २ जीपीए ल्याउने एक लाख ५९४ जना छन् भने १.२ देखि १.६ जीपीए ल्याउनेको संख्या ४४ हजार ५८६ र ०.८० जीपीएदेखि १.२ जीपीए ल्याउनेको संख्या तीन हजार २८० रहेको छ । २०७८ को एसईई परीक्षा वैशाख ९ गतेदेखि २० गतेसम्म सञ्चालन भएको थियो ।

एसईईको नतिजा हेर्नकालागि राष्ट्रिय परीक्षा बोर्ड, राष्ट्रिय परीक्षा बोर्ड परीक्षा नियन्त्रण कार्यालय कक्षा १०, नेपाल टेलिकम लगायतको वेबसाइट क्लिक तथा आईभीआर र एसमएमएस गर्न सकिनेछ। यस्तै खल्तीले पनि नतिजा हेर्ने व्यवस्था गरेकाे छ ।