चोरी आरोपमा १० जना पक्राउ

 नुवाकोट । विद्युतीय उपकरणसम्बन्धी होलसेल पसलमा चोरी गरी अन्यत्र लगेर सामान बेच्ने १० जना पक्राउ परेका छन् ।

काठमाडौं प्रहरी परिसरअन्तर्गत जनसेवा वृत्तबाट खटिएको प्रहरी टोलीले दुई भारतीय नागरिकसहित १० जनालाई पक्राउ गरेको हो । पक्राउ पर्नेमा चोरीका सामान किन्ने सिंह ट्रेडर्सका सञ्चालक तेजनारायण सिंहसमेत छन् । सिंहले कसुर स्विकार्दै भोलिपल्टै प्रहरीमा आत्मसमर्पण गरेका थिए । सिंहसँगै प्रहरीले सामान चोरेर बेच्ने दुई जना कामदार सविन अर्याल र कुवेर ढकाललाई पनि पक्राउ गर्‍यो ।

भोटेबहालस्थित शुभलाभ इलेक्ट्रिकलका रमेश थापा र अमृत दुवाडी, साइमन इलेक्ट्रिक्सका कामदार राजु प्याकुरेल, जेपी इलेक्ट्रिक्सका कामदार प्रकाश थापा र सोही पसलका भारतीय कामदार केकी हुसेन तथा केरेन इन्टरनेसनलका कामदार सुशील खतिवडा र ओमनारायण चौधरी पक्राउ परेका हुन् । आरोपित सबैले कसुर स्वीकार गर्दै बयान दिएका छन् ।

आफ्नो स्टोरबाट चोरी भएका करिब २५ लाख बराबरका सामान बरामद भएको र आरोपितले विगत तीन वर्षदेखि सामान चोरेर अरूलाई बेच्ने गरेको बयान दिएको पीडित गुप्ताले बताए । उनले आफ्नो पसलबाट तीन वर्षमा ७५ लाखभन्दा बढीको सामान चोरी भएको दाबी गरे ।

काठमाडौं प्रहरी परिसरका प्रवक्ता एसपी दिनेश मैनालीले विद्युतीय उपकरण चोरी गर्ने र चोरीको मालवस्तु किन्ने १० जनालाई पक्राउ गरी अनुसन्धान अघि बढाइएको बताए । ‘लामो समयदेखि पसलकै कामदार र उनीहरूका सम्पर्कमा भएका अरू व्यक्तिले सामान चोरेर अरू पसलमा सस्तोमा बेच्ने गरेको देखिन्छ,’ एसपी मैनालीले भने ।