फेरि सर्‍यो लाइसेन्स आवेदन खोल्ने मिति

नुवाकोट । नयाँ सवारी अनुमतिपत्र (लाइसेन्स) को आवेदन खुल्नेबारे फेरि अन्योल भएको छ ।

पुरानो लाइसेन्स वैशाख मसान्तभित्र वितरण सकेर जेठ पहिलो साताबाट नयाँ आवेदन खोल्ने दाबी गर्दै आएको यातायात व्यवस्था विभागले समय फेरि जेठ दोस्रो साता पुर्‍याएको छ । तर विभागले भनेझैं फेरि तोकिएको समयमा लाइसेन्सका लागि आवेदन खुल्ने अवस्था छैन । 

पटकपटक लाइसेन्सका लागि नयाँ आवेदन खोल्ने विषयमा विभागले मिति ढाँट्दै आएको छ । पुरानो लाइसेन्स वितरण गरी नसकिएकाले नयाँका लागि अनलाइन आवेदन खोलिएको छैन । चैतदेखि अनलाइन आवेदन बन्द हुँदा नयाँ सेवाग्राही अवसरबाट वञ्चित छन् । विभागले सुरुमा जेठ १ बाट नयाँ आवेदन खोल्ने जनाएको थियो ।

पछि फेरि निर्वाचनलाई कारण देखाउँदै जेठ ४ मा पुर्‍यायो । अहिले जेठ १५ भित्र अनलाइन आवेदन खोल्ने विभागको दाबी छ । जेठ पहिलो साता भनिए पनि प्राविधिक समस्याले गर्दा त्यो समयमा हुन नसकेको यातायात व्यवस्था विभागका सूचना अधिकारी ईश्वरीदत्त पनेरुले बताए ।

‘आवेदन दिने विषयलाई पुरानो प्रणालीबाट नयाँ प्रणालीमा मिलाउँदा समस्या भएको हो । प्राविधिकहरू यसैलाई व्यवस्थापन गर्न लागेका छन्,’ उनले भने, ‘अब भने जेठ १५ भन्दा पछि नपुर्‍याउने गरी काम गरिरहेका छौं ।’ केही जनशक्ति निर्वाचनमा खटिँदा काम प्रभावित बन्न पुगेको उनको दाबी छ । ‘भनेको समयभन्दा केही दिन ढिला भएकै हो,’ उनले भने, ‘आवेदन खोल्नेबारे ९० प्रतिशत तयारी सकिएको छ, अब धेरै समय लाग्दैन ।’ पहिला सबै पुराना लाइसेन्स प्रिन्ट गरेर सम्बन्धित यातायात व्यवस्था कार्यालयलाई दिएपछि मात्र नयाँ आवेदन खोल्ने जनाएको विभाग अहिले पुराना लाइसेन्सको प्रिन्ट नसक्दै नयाँ खोल्ने तयारीमा लागेको छ ।

‘अब बढीमा डेढ लाख लाइसेन्स प्रिन्ट गर्न बाँकी छ, यो काम पनि जेठ मसान्तभित्र सकिन्छ,’ पनेरुले भने, ‘त्यसअघि नै नयाँ आवेदन खुलाउँछौं ।’ पुरानो बक्यौता लाइसेन्स वितरणले नयाँ आवेदन खोल्न कुनै समस्या नहुने उनको भनाइ छ । तर यसअघि विभागका महानिर्देशक नमराज घिमिरेले पुरानो लाइसेन्स सबै वितरण गरेर मात्र नयाँ आवेदन खोल्ने दाबी गरेका थिए । उक्त काम जेठ नलाग्दै सकिसक्ने उनले बताएका थिए । तर उनले भने जस्तो अहिलेसम्म न पुराना लाइसेन्स नै वितरण भइसके, न नयाँका लागि आवेदन नै खुल्न सके ।

विभागका अनुसार अहिलेसम्म सन् २०२१ डिसेम्बरसम्मको मात्र लाइसेन्स वितरण भएको छ । आवेदन दिएर बसेकालाई सन् २०२४ सम्मको मिति दिइएको छ । अहिले उनीहरू पालो पर्खिएर बसेका छन् । लाइसेन्स नवीकरण गर्न दिएकाहरू वर्षौंदेखि राजस्व तिरेको चिर्कटो बोकेर हिँड्न बाध्यता छन् । ‘प्रतिदिन ४५ सयदेखि ६ हजार कार्ड प्रिन्ट भइरहेको छ । यो काम बिहान ६ देखि राति १० बजेसम्म भइरहेको छ,’ पनेरुले भने, ‘नवीकरण गर्ने पनि धेरै भए, एउटा मात्र मेसिन छ । यसको क्षमता प्रतिदिन ६ हजारसम्म मात्र प्रिन्ट गर्ने हो, त्यसैले पनि ढिलाइ भएको हो ।’

लाइसेन्स प्रिन्ट गर्न ललितपुरको एकान्तकुना र काठमाडौंको ठूलोभर्‍याङ कार्यालयको बढी छ । ‘प्रिन्ट भएर पनि पठाउन समय लाग्छ,’ उनले भने, ‘बीचमा कुनै समस्या नआए तोकिएकै समयमा लाइसेन्सको काम सकिन्छ ।’ २०७८ पुस १३ मा स्मार्ट लाइसेन्सको प्रिन्ट थाल्दासम्म ५ लाख ५० हजार लाइसेन्स प्रिन्ट गर्न बाँकी थियो । लाइसेन्सका लागि आवेदन दिएकाहरूलाई सन् २०२४ नोभेम्बरसम्म समय तोकिए पनि त्यसलाई व्यवस्थापन गर्ने काम भइरहेको दाबी विभागको छ ।

अब लाइसेन्सका लागि पहिले जस्तो लामो समय पर्खिनु नपर्ने विभागले दाबी गरिरहेको छ । तर पनि सुस्त काम गराइले सेवाग्राही मारमा छन् । क्यूआर कोडसहितको नयाँ लाइसेन्स एक वर्षको हुनेछ । एक वर्षमा ५ पटकभन्दा कम गल्ती गरेको पाइए सेवाग्राहीले स्मार्ट लाइसेन्स पाउनेछन् ।