नुवाकोटमा कांग्रेसको ‘घर–घर जाऔं, कांग्रेस जिताऔं’ अभियान शुरु

नुवाकोट । नुवाकोट । नेपाली कांग्रेस नुवाकोटले ‘घर–घर जाऔं, कांग्रेस जिताऔं’ अभियान शुरु गरेको छ ।

आईतबार नेपाली कांग्रेस नुवाकोटले पार्टी कार्यालय विदुरमा एक कार्यक्रमको आयोजना गरि जिल्लामा स्थानीय तहको निर्वाचनलाई लक्षित गरी एक महिने चुनावी अभियान सुरु गरेको हो ।

कांग्रेसले चुनावी अभियानको नारा ‘घर–घर जाऔं, कांग्रेस जिताऔं’ तय गरेको छ ।
अभियानको क्रममा पार्र्टीका एजेण्डा, राष्ट्रिय मुद्दामा पार्टीको अडान, सरकारका उपलब्धि लगायतका विषयमा जनतालाई जानकारी दिने र जनताबाट सुझावसमेत लिने नेपाली कांग्रेस नुवाकोटका जिल्ला प्रतिनिधि मदबहादुर अमात्यले जानकारी दिए ।

अभियानको क्रममा कांग्रेसको नेतृत्वमा हासिल उपलब्धिबारे जनतालाई जानकारी गराउने, एमसीसीबारेका भ्रमलाई चिर्ने र विगतको सरकारका पालामा भएका असंवैधानिक कदम र भ्रष्टाचार प्रकरण जनतासमक्ष राख्ने नेपाली कांग्रेस नुवाकोटका सभापति रमेशकुमार महतले जानकारी दिए ।

यस्तै कार्यक्रममा नेपाली कांग्रेस महासमिति सदस्य गिता अमात्य, नेपाली कांग्रेस ककनी गाउँपालिकाका अध्यक्ष भाग्य श्री लामा, नेविसंघका क्षेत्रिय अध्यक्ष कृष्ण मिश्र लगायतले आगामी निर्वाचनमा कांग्रेस एक ढिक्का हुनुपर्ने बताए ।

कार्यक्रममा पार्टीभित्र आन्तरिक लोकतन्त्र सृढ नभएको भन्दै कार्यकर्ताहरुले नेतृत्वको चर्काे आलोचना गरेका थिए ।