नुवाकोटमा विप्लव माओवादीको एकघण्टा चक्काजाम

नुवाकोट । पेट्रोलियम पदार्थमा गरिएको मूल्य वृद्धिको विरोधमा नेत्रविक्रम चन्द विप्लव नेतृत्वको नेकपाले नुवाकोटमा एकघण्टा चक्काजाम गरेको छ ।

्आईतबार विहान विप्लव नेतृत्वको नेकपाका जनवर्गीय संगठनले मूल्य वृद्धिको विरोधमा गंगटे बजार क्षेत्रमा प्रर्दशन गरेर एक घण्टा चक्काजाम गरेका हुन् ।

प्रदर्शनमा उत्रिएका विप्लव नेतृत्वको नेकपाका कार्यकर्ताहरूले ’सबैखाले महँगी नियन्त्रण गर’, ’दलाल संसदीय व्यवस्था मुर्दावाद’, ’संयुक्त जबस जिन्दावाद’, ’पेट्रोलियम पदार्थमा गरिएको मूल्य वृद्धि फिर्ता गर’, ’जनमारा सरकार मुर्दावाद’ लगायतका नारा लेखिएका प्लेकार्ड बोकेका थिए ।

करिव १० जना उपस्थिति भएको चक्काजामको असर भने बजार क्षेत्रमा सामान्य रुपमा समेत परेन । विप्लवका कार्यकर्ताहरुलाई गंगटेका स्थानिये चक्काजाम नगर्न आग्रह गरेका थिए ।

प्रदर्शनमा सहभागीहरूले पेट्रोलियम पदार्थमा गरिएको मूल्यवृद्धि फिर्ता लिन सरकारसँग माग गर्दै नाराबाजी समेत गरेका थिए । नेपाल आयल निगमले बुधबारदेखि लागू हुने गरी पेट्रोल, डिजेल र मट्टीतेलको मूल्य वृद्धि गरेको थियो ।