दुप्चेश्वर मन्दिरमा धान्यपूर्णिमा मेला सुरु

नुवाकोट । नुवाकोटको दुप्चेश्वर गाउँपालिकास्थित दुप्चेश्वर मन्दिरमा धान्यपूर्णिमा मेला सुरु भएको छ ।

प्रत्येक वर्ष मार्गशिर्ष एकादशीबाट पूर्णिमासम्म लाग्ने यो मेला भर्न देशका विभिन्न भागबाट दर्शनार्थी आउने गरेका छन् । यस वर्ष मंसिर लागेदेखी नै दर्शनार्थीको भिड लाग्न थालेको दुप्चेश्वर क्षेत्र विकास कोषका अध्यक्ष किशोर आचार्यले बताएका छन् ।

मेलालाई लक्षित गरेर दुप्चेश्वर नव वधु झैँ सिँगारिएको छ । दर्शनार्थीको सहजताका लागि दुप्चेश्वर गाउँपालिकासँगको समन्वयमा दुप्चेश्वर क्षेत्र विकास कोषले दर्शनार्थीको लाम व्यवस्थापन, सुरक्षा व्यवस्थपन, भेटी व्यवस्थापनका अलावा सवारी साधन पार्किङ व्यवस्थापनको कार्य सुरु गरिसकेको छ ।

सवारीको सहज आवागमनका लागि कोषले प्रहरी र स्वयम् सेवकको व्यवस्था गरेको बताएको छ । त्यसैगरी सुरक्षा व्यवस्थापनका लागि सशस्त्र प्रहरी र नेपाल प्रहरी गरी करीब ६० जना सुरक्षाकर्मी मेलामा खटिने भएका छन् । त्यसैगरी स्थानिय २५ जना स्वयम्सेवक युवाहरु दर्शनार्थीको लाम व्यवस्थापनमा खटिएका छन् ।

दुप्चेश्वर, करीब २०० मिटर अग्लो विशाल शिलाको बिचोबिच अर्ध वृत्ताकार भागको केन्द्रमा अवस्थित प्राकृतिक शिवलिंग हो । जनश्रुति अनुसार करीब साढे चार सय वर्ष अघि यसै समयमा पत्ता लागेको दुप्चेश्वरमा त्यसयता धान्यपूर्णिमामा मेला लाग्ने गरेको मन्दिरका पुजारी भगवानहरि धितालले बताए ।

बाटोघाटोको सुगमताका कारण पछिल्लाा वर्षहरुमा दुप्चेश्वरमा बाह्रै मास दर्शनार्थीको भिड लाग्ने गरेको छ । खास गरेर ऋषि पञ्चमी, ठूलो एकादशी, शिवरात्री, बालाचतुर्दशी जस्ता पर्व र मंसिर एवं साउनको सोमबार र शनिवार दुप्चेश्वरमा दर्शनार्थीको निकै भिड लाग्ने गर्दछ ।

मेलालाई लक्षित गरेर दुप्चेश्वर भन्दा तलको गोगनचउर भरिभराउ भएको छ । धार्मिक अनुष्ठानदेखी, स्वास्थ्य सिविर र व्यापारिक स्टलहरुले गोगनचउर ढाकेको छ । त्यसबाहेक मुख्य द्वारदेखी मन्दिरसम्म जाँदा र फर्कँदा दर्शनार्थीले भक्ति संगीत सुन्ने प्रवन्ध समेत मिलाइएको छ । त्यसका लागि मुख्य गेटदेखीनै दुप्चेश्वर परिसरका हरेक कुना कुनामा साउण्ड सिस्टम फिट गरिएको आचार्यले बताए ।

गाउँपालिकासँगको समन्वयमा रामती बजारदेखी मन्दिरसम्म बाटैभरी सीसीटीभी क्यामेरा समेत जडान गरिएको छ । उक्त सीसीटीभीको मनिटर गाउँपालिकामा राखिएको छ । दर्शनार्थीको सुरक्षा र सहज ढंगबाट दर्शन गर्ने व्यवस्था आम दुप्चेश्वर बासी र दुप्चेश्वर गाउँपालिकाको दायित्व भएको दुप्चेश्वर गाउँपालिकाका अध्यक्ष योविन्द्रसिँह तामाङ बताउँछन् । दर्शनार्थीको सुरक्षाकै लागि सीसीटीभीको व्यवस्था गरिएको उनको भनाई छ ।

त्यसबाहेक मन्दिर परिशरलाई पनि सिसिटिभी क्यामेराको निगरानीमा राखिएको छ । उक्त सीसीटीभीको फुटेज कोषको कार्यालय र दुप्चेश्वर गाउँपालिकाका अध्यक्षको कार्यकक्षमा डिस्प्ले हुने व्यवस्था मिलाइएको छ ।